Li Nisêbînê qeza: Karmendekî şaredariyê mir

Hewlêr (Rûdaw) - Li navçeya Nisêbînê ya parêzgeha Mêrdînê ya Bakurê Kurdistanê otomobîlek ket nav qada xebatê ya tîmên şaredariyê.

Di qezayê de karmendê şaredariyê Zana Çelîkê 37 salî mir û 2 kes jî birîndar bûn.

Qeza li taxa Dîcleyê ya Nisêbînê çêbû.

Li gorî agahiyan, şofêr kontrola otomobîlê ji dest daye û ketiye qada xebatê ya tîmên şaredariyê yên ku rê çêdikirin.

Otomobîl li karmendên şaredariyê, makîneya kar û wesayîta şaredariyê qelibî.

Li ser agahdarkirinê tîmên tenduristiyê û polîs çûn cihê bûyerê.

Tîmên tenduristiyê tespît kir ku karmendê şaredariyê Zana Çelîk di cih de miriye.

Di qezayê de Zarav A.yê 15 salî û Mustafa S.yê 21 salî birîndar bûn.

Piştî midaxeleya destpêkê ew veguhastin Nexweşxaneya Dewletê ya Nisêbînê.

Polîsan li herêmê tedbîrên ewlehiyê standin û li ser qezayê lêpirsîn da destpêkirin.