Amed (Rûdaw) - Ev çend roj in desteserkirina birêvebirên Hevbendiya Neteweyî ya Kurdistanê (HEVBENDÎ) bû rojeveke sereke.
Bi tevahî 14 siyasetmedarên Kurd ên ku di çarçoveya dosyaya HEVBENDÎyê de hatibûn desteserkirin, piştî wergirtina îfadeyên wan ên li Serdozgeriya Komarê ya Amedê hatin berdan.
4 siyasetmedaran bi Kurdî îfade da
Piraniya siyasetmedarên ku hatibûn desteserkirin red kir ku li midûriyeta ewlehiyê îfadeyê bidin.
Li gorî agahiyan, 4 siyasetmedarên Kurd li dozgeriyê îfadeya xwe bi Kurdî daye.
Nûnerê PÊLKURDê Fuat Onen, Alîkarê Serokê Giştî yê PWKyê Mehmet Can Azbay, siyasetmedar Alî Oncu û Ehmed Geçer li Dozgeriya Amedê bi Kurdî îfade da.
Fuat Onen: Ez vê rewşê protesto dikim
Nûnerê PÊLKURDê Fuat Onen sedema xwe ya redkirina îfadeyê jî derbasî ser kaxezê kir.
Onen li hemberî polîsê ku dixwest îfadeya wî bistîne wiha bersiv da:
"Ez Fuadê kurê Mehmûd im. Ez şoreşgerê Kurdistanê me. Li ber destê sibehê 20-30 polîsan avêt ser mala min. Bêyî ku li derî bixin, derî şikandin û ketin hundirê mala min.
Destên min ji piştê ve kelepçe kirin û miameleyeke dijminane kirin. Ji ber vê yekê ez vê rewşê protesto dikim û li midûriyeta ewlehiyê îfade nadim."



