Hewlêr (Rûdaw) - Parêzgarê Sineyê fermana vegerandina navên resen ên Kurdî ji bo wan gundan derxist ku berê navên wan hatibûn guhertin.
Parêzgarê Sineyê got, "Divê heta sê mehên din hemû tabelayên navên gundan bên guhertin û bi her du zimanên Kurdî û Farisî bên nivîsandin."
Parêzgarê Sineyê yê Rojhilatê Kurdistanê Areş Lihonî doh pêncşemê (19ê Çiriya Paşîn a 2026an) bi qaymeqamên herêmê re civiya.
Areş Lihonî di civînê de qala girîngiya navên Kurdî yên gundan kir û got, "Parastina zimanê Kurdî, çand û nasnameya xelkê parêzgehê erkekî çandî û dîrokî ye."
“Nabe ev navên bêwate bimînin”
Areş Lihonî bal kişand ser navên wan gundan ku di dema borî de ji ber sedemên cuda hatine guhertin û got:
"Navên gundan beşek ji nasnameya dîrokî û çandî ya xelkê her herêmekê ne.
Nabe ku em li hemberî wan navên neguncaw yan wergerên şaş bêxem bin ku bi dirêjahiya çend dehsalan ji bo hinek herêman hatine bikaranîn."
Parêzgarê Sineyê gundê Mamîzekê yê Kamêranê wekî mînak anî ku di dema borî de ji ber sedemeke nediyar navê wî wekî "Mehmûd Gezek" hatiye guhertin û got:
"Niha çima navê wî gundî kirine Mehmûd Gezek û wateya wê çi ye, tenê Xwedê dizane. Nabe ku ev navên bêwate bimînin."
Komîteyên lêkolînê tên avakirin
Areş Lihonî di civînê de qaymeqam erkdar kirin ku li sînorê bajaran komîteyên 5 kesî ava bikin.
Divê ew komîte bi beşdariya mamoste û pisporên zimên li ser wan gundan lêkolînê bikin ku navên wan bêwate ne, neguncaw in yan jî xelk dixwaze bên guhertin.
Li gorî gotina Parêzgarê Sineyê, encamên lêkolîna van komîteyan dê piştî komkirin û kurtkirinê ji birêvebiriya parêzgehê re bên ragihandin.
Piştî wê jî dê ji bo temamkirina qonaxên yasayî ji beşa dabeşkirinê ya li Tehranê re bên şandin.
Areş Lihonî bal kişand ser hewldana du salan a li beşeke parêzgehê ya ji bo daliqandina tabelayên Kurdî yên navên tax û gundan li kêleka nivîsa Farisî.
Wî got ku dê ev pêvajo bidome û hemû bajar dikarin tabelayan bi zimanê Kurdî jî binivîsin.
Li Sineyê hezar û 856 gund hene
Li gorî amarên dawî Encûmena Parêzgeha Sineyê, li parêzgehê hezar û 856 gund hene.
Ji wan gundan hezar û 651 gund avedan in û 205 gund jî vala ne.



