Hewlêr (Rûdaw) - Şaredarê Seferîhîsarê yê CHPyê Îsmaîl Yetişkîn di çarçoveya lêpirsîna bertîlê ya li ser Şaredariya Seferîhîsarê de, hat girtin.
Di dosyeya ku li navçeya Seferîhîsarê ya Îzmîrê tê dîtin de, biryarên nû hatin dayîn.
Bi fermana Serdozgeriya Komarê ya Seferîhîsarê, kesên desteserkirî serê sibehê veguhastin dadgehê.
Îfadeyên wan ên li dozgerî û dadgehê bi dawî bûn.
Piştî îfadeyan, dozgerê komarê daxwaza girtina 17 gumanbaran kir.
Dozger ev 17 kes sewqî Dadgeriya Cezayê ya Silhê kirin.
Şaredarê Seferîhîsarê Îsmaîl Yetişkîn jî di nav van kesan de ye.
Ji gumanbarên din yek bi daxwaza kontrola dadî sewqî dadgeriyê hat kirin.
Her wiha 2 gumanbar jî piştî îfadeya li dozgeriyê hatin berdan.
12 kes hatin girtin
Gumanbaran li dadgeriyê parastina xwe kir û dadgehê biryara xwe eşkere kir.
Dadgeriyê biryara girtina 12 gumanbaran da.
Şaredarê Seferîhîsarê Îsmaîl Yetişkîn jî di nav kesên girtî de ye.
Gumanbarê ku bi şertê kontrola dadî hatibû şandin, bi heman şertî hat berdan.
Kesên ku biryara girtina wan hat dayîn yekser şandin girtîgehê.
Li ser hûrgiliyên lêpirsînê hîn daxuyaniyeke berfireh ji aliyê rayedaran ve nehatiye dayîn.
Çi qewimîbû?
Di lêpirsîna bertîlê ya li ser Şaredariya Seferîhîsarê de ji bo 26 kesan biryara desteserkirinê hatibû dayîn.
Di nav wan de Şaredarê Seferîhîsarê Îsmaîl Yetişkîn, Şaredarê Balçovayê Onur Yîgît, Alîkarên Şaredarê Seferîhîsarê N.H. û Î.K. û Endamê Meclisa Bajarê Mezin a Îzmîrê û Guzelbahçeyê D.B. jî hebûn.
25ê Hezîranê li navenda Îzmîrê û li Stenbolê, Edeneyê û Aydinê operasyon hatin kirin û 25 kes hatin desteserkirin.
Ji kesên desteserkirî, dayîka Şaredarê Balçovayê Onur Yîgît Meryem Yîgît û gumanbarê bi navê O.F.S. piştî îfadeya li navenda ewlehiyê hatibûn berdan.
Şaredarê Balçovayê Onur Yîgît û Endamê Meclisa Bajarê Mezin a Îzmîrê D.B. bi şertê kontrola dadî hatibûn berdan.
Gumanbarekî din jî piştî îfadeya li dozgeriyê hatibû berdan.
