Hewlêr (Rûdaw) - Abdullah Ocalan ji Heyeta Îmraliyê re gotiye, “Hîn her tişt nehatiye çareserkirin lê rewşeke ku nêzîkbûna neyînî bixwaze jî tune. Ya girîng ew e ku ev gav rast were têgihiştin û her kes ji bo serkeftina pêvajoyê berpirsiyariyê bigire ser xwe.”
Endamên Heyeta Îmraliyê ya DEM Partiyê, doh li Girava Îmraliyê bi Abdullah Ocalan re hevdîtinek kir.
Li gorî daxuyaniya DEM Partiyê ya ji bo medyayê, heyeta ku ji Pervîn Buldan, Mîthat Sancar û Faîk Ozgur Erol pêk tê bi Ocalan re nêzîkî 3 demjimêran hevdîtin kiriye.
Heyetê îro derbarê wê hevdîtinê daxuyaniyeke nivîskî belav kir û ew daxuyanî bi vî rengî ye:
“Ji Çapemenî û Raya Giştî re,
Me wekî Lijneya Îmraliyê ya Partiya DEMê, di 2yê Tebaxa 2026an de bi Birêz Abdullah Ocalan re hevdîtinek pêk anî.
Di hevdîtinê de Birêz Ocalan li ser pêvajoya heyî, xebatên ku tên meşandin û berpirsiyariyên dîrokî yên dema pêş de nirxandinên xwe kirin. Wî peyamên ku dixwaze ji raya giştî re bên ragihandin jî dan heyetê.
Peyamên Birêz Ocalan ev in:
‘Rêya hezar kîlometreyan bi gavêkê dest pê dike.
Em bi vê qanûnê ji bo çareserkirina pirsgirêkeke dîrokî dest bi meşa dirêj dikin û dikevin rê. Em di destpêka pêvajoyeke demokratîkbûnê de ne ku bi qasî avakirina Komarê girîng e.
Çawa ku di avakirina Komarê de ked û fedekariyeke mezin hate nîşandan, niha jî ji bo komara demokratîk pêwîst e em bi heman cidîyetê bixebitin.
Ev ne tenê ji bo gelê Kurd an jî bo beşeke civakê ye. Ev ji bo her kesê li ser vê axê dijî pêwîstiyek e. Gava ku were avêtin, dê bandorê li çarenûsa welat û herêmê bike.
Ew dê rê li ber pêşketina hiqûqa demokratîk û mezinbûna derfetên aborî veke. Ev xizmeteke mezin e ji bo 86 milyon kesan.
Em dê bi rêxistiniya civakê derketineke dîrokî bikin. Ev gav dê ji bo aştî û aboriyê alîkariyeke mezin bi xwe re bîne.
Hîn her tişt nehatiye çareserkirin lê rewşeke ku nêzîkbûna neyînî bixwaze jî tune. Ya girîng ew e ku ev gav rast were têgihiştin û her kes ji bo serkeftina pêvajoyê berpirsiyariyê bigire ser xwe.
Qanûna ku siyaset dê wê derxe, mifteyek e ku rêya vê pêvajoyê veke. Bi vê gavê re deriyê komara Demokratîk heta dawiyê vedibe.’
Ji bo raya giştî bi rêzdarî.
Lijneya Îmraliyê ya Partiya DEMê
3yê Tebaxa 2026an”
