Li Stenbolê agir bi otelekê ket: 12 kes birîndar bûn

Hewlêr (Rûdaw) - Li navçeya Bakirkoyê ya parêzgeha Stenbolê ya Tirkiyeyê, agir bi otelekê ket û 12 kes birîndar bûn.

Şewat li taxa Cevîzlîkê ya li ser Cadeya Muhasebeciyê ya navçeya Bakirkoyê derket.

Heta niha nayê zanîn bê ka agir ji ber çi bi qata yekem a oteleke 6 qatî ketiye.

Agir di demeke kurt de geş bû û gihîşt qatên jor.

Li gel bihîstina bûyerê, tîmên parastina sivîlan, polîs û tîmên tenduristiyê çûn cihê bûyerê.

Tîmên parastina sivîlan 7 kesên ku li qatên jor asê mabûn rizgar kirin.

Tîman 12 kesên birîndar jî, piştî midaxeleya destpêkê ya di ambulansan de birin nexweşxaneyan.

Piştî hewldanên nêzîkî demjimêrekê, agir hat vemirandin.