Hewlêr (Rûdaw) - Rewangeha Sûriyeyê ya Mafên Mirovan (SOHR) ragihand ku Hêzên Sûriyeya Demokratîk (HSD) û îdareya nû ya Sûriyeyê li hev kirine ku dîlên şer bên azadkirin û ewlehiya du taxên Kurd ên Helebê jî bispêrin ewlehiya giştî ya Hikûmeta Sûriyeyê.
SOHRê diyar kir ku rêkeftineke destpêkî di navbera îdareya nû ya Sûriyeyê û HSDyê heye ku çend xalan li xwe digire.
Li gorî vê yekê hêzên ewlehiya navxweyî "Asayiş" ku ser bi Rêveberiya Xweser in, li taxên Şêx Meqsûd û Eşrefiyê li bajarê Helebê, bi heman kadroyan dibin hêzên ewlehiya giştî û ser bi "Xwebirêvebirinê" dibin.
Her li gorî rêkeftinê; îdareya nû ya Sûriyeyê dê 170 dîlên HSDyê berde û hejmarek termên şehîdan radestî wan dike, li hember de HSD 400 dîl û termên komên çekdar radest bike.
Derbarê Efrînê de, HSD daxwaza garantiyê ji bo vegera koçberan dike û ew garantî jî ev in:
"Derketina wan komên çekdar ên ku Tirkiye piştgiriya wan dike û dagirtina cihên wan bi ewlehiya giştî, "ji ber ku niştecih baweriya xwe bi komên çekdar nînin."
Peymana 10ê Adarê
Fermandarê Giştî yê HSDyê Mezlûm Ebdî û Serokkomarê Sûriyeyê Ehmed Şer 10ê Adara 2025an peymaneke ku ji 8 xalan pêk te imze kiribû.
Xalên peymana Ebdî û Şer ev in:
1- Garantîkirina mafê hemû Sûriyeyiyan di nûnertî û beşdariyê di pêvajoya siyasî de û di hemû saziyên dewletê de li gorî pisportiyê bêyî ku girêdana wan a olî û etnîkî di ber çavan re were derbaskirin.
2- Civaka Kurdan di dewleta Sûriyeyê de civakeke resen e û dewleta Sûriyeyê mafê wan ê hevwelatîbûn û hemû mafên wan ên destûrî misoger dike.
3- Agirbesta li seranserê axa Sûriyeyê.
4- Tevlîkirina hemû saziyên sivîl û leşkerî yên li bakurrojhilatê Sûriyeyê di çarçoveya birêveberiya dewleta Sûriyeyê de, di nav de deriyên sînorî, firokexane, zeviyên petrol û gazê.
5- Garantîkirina vegera hemû koçberên Sûriyeyî ku biçin gund û bajarên xwe û parastina wan ji aliyê dewletê ve.
6- Piştgiriya dewleta Sûriyeyê di rûbirûbûna bermayiyên Esed û hemû wan gefên ku ewlehî û yekparçeyiya axa wê tehdît dikin.
7- Redkirina daxwazên parçekirin û helwestên kîndarî û hewldanên derxistina tevliheviyan di navbera pêkhateyên civaka Sûriyeyê de.
8- Komîteyên birêvebirinê dê kar ikin û hewl didin ku peyman were bicihkirin bi rengekî ku heta dawiya vê salê derbas neke.”
