Hewlêr (Rûdaw) - Hevpeymaniya Hêzên Siyasî yên Rojhilat, li ser rûdanên piştî kuştina Rêberê Îranê Elî Xamineyî daxuyaniyek belav kir.
Di daxuyaniyê de hat diyarkirin ku birêvebiriya Tehranê "ketiye pêvajoya rûxînê " û ji bo gelê Kurd planeke çalakiyê ya bilez a ku ji 6 xalan pêk tê hat eşkerekirin.
"Hevpeymaniya Hêzên Siyasî yên Rojhilatê Kurdistanê" ya ku ji pênc partiyên Rojhilatê Kurdistanê (PDK-Î, Komele, PAK, PJAK û Xebatê) pêk tê, daxuyaniya hevpar a li ser geşedanên leşkerî û siyasî yên li herêmê parve kir.
Hevpeymaniyê destnîşan kir ku "Pêvajoya heyî ne tenê şerek e, destpêka guherîneke bingehîn a pergalê ye."
“Kuştina Xamineyî bandora domînoyê xurt kir”
Di daxuyaniyê de wiha hat gotin:
"Polîtîkayên dagirker, xeyalên nukleer, destwerdana di karên navxweyî yên welatên herêmê de û çalakiyên terorê yên bi piştgiriya dewletê ku rejîma Îranê ev 47 sal in dimeşîne, welat aniye ber rûxînê."
Partiyên Rojhilatê Kurdistanê diyar kir, "Kuştina Rêberê Olî Xamineyî û bi dehan rayedarên payebilind ên leşkerî-siyasî, pêvajoya rûxîna vê rejîmê bi lez kiriye û bandoreke domînoyê çêkiriye.
Niha em di nav rojên herî krîtîk re derbas dibin ku em dê çarenivîsa xwe diyar bikin."
Nexşerêya 6 xalî ya ji bo gel
Hevpeymaniyê ji bo rêlibergirtina kaosê û parastina destkeftiyên gel ev bang kir:
- Divê gelê Kurdistanê li hemberî rûdanan hestiyar be, bertekên xwe li ser bingeheke aqilane nîşan bide û gavên xwe yên siyasî li gorî arastekirina Hevpeymaniyê biavêje.
- Di pêvajoya rûxîna rejîmê û serhildana gel de divê hemû avahiyên îdarî, tesîsên xizmetguzariyê û binesazî werin parastin. Ev avahî malê hevpar ê gel in û ji bo pêdiviyên paşerojê xwedî girîngiyeke jiyanî ne.
- Em bangî artêş, polîs û hêzên milîs ên ku li Kurdistanê wezîfedar in dikin: Ji paşmayên Komara Îslamî veqetin. Ji bo ku hûn pişta xwe bidin dijmin û derbasî refên neteweya xwe bibin vê derfeta dawî ji dest medin.
- Divê pêvajoya guherînê bi gihîştîbûn (stewihîbûn) were pêşwazîkirin. Divê ji tevgerên tund, çalakiyên tolhildana şexsî û kaosê ku ewlehiya civakî bixe metirsiyê dûr were sekinandin û aştiya civakî were parastin.
- Ji bo ewlehiya canê welatiyan, divê heta ku mumkin be ji baregehên leşkerî, navendên ewlehiyê û xalên stratejîk ên rejîmê dûr bisekinin.
- Ji bo derbaskirina van rojên dijwar hevkariya hevdû şert e. Bi taybetî divê xwediyên milkan û esnafên me, xwedî li kirêdar, xizan û bêmalan derkevin, di vê pêvajoyê de nabe kes bêxwedî were hiştin.
Di daxuyaniyê de hat destnîşankirin, "Ev şer di navbera rejîma ku gelên me di bin zextê de dihêle û civaka navneteweyî de ye. Divê gelê me vê pêvajoyê ji bo azadiya xwe veguherîne derfetekê."
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse