Hewlêr (Rûdaw) - Li parêzgehên Bakurê Kurdistanê barîna berfê berdewam e û bandoreke nerênî li jiyana rojane ya welatiyan dike. Li parêzgehên Erzerom, Erzîngan, Îdirê, Semsûr û Mûşê ji ber berf û pûkê rêya 166 gund û navçeyan hat girtin. Li herêmê ev demeke berf dibare û ji ber mij, keş û hewaya xirab û barîna zêde ya berfê çûn û hatin zehmet bûye.
Îdareya Taybet a Bajarê Erzeromê ragihand ku ji ber berfa zêde rêya 80 gund û gundikan hatiye girtin û tîmên şaredariyê bi makîneyên kar û karmendan bi armanca vekirina rêyan li ser kar û xebatên xwe berdewam in.
Herwiha bi heman sedemê li Erzînganê rêya 28 û li Îdirê jî rêya 2 gund û gundikan hatiye girtin. Aliyên peywendîdar ji ber egerên çêbûna bûyerên trafîkê û metirsiya aşûtê berdewam hişyariyê didin welatiyan ku ji xeynî rewşên awarte zêde çûn û hatinê nekin.
Li Semsûr ji ber berfê rêya 23 cî û waran girtî ye
Li gor daxuyaniya Îdareya Taybet a Bajêr li Aldûş rêya 13, Serê Golan a yekê û Sîncîkê jî rêya 9 cî û waran ji ber berfê girtî ye.
Serokê Meclisa Giştî ya Bajêr Mehmet Erdogan Can diyar kir ku ji bo vekirina rêyên gund û goman xebat didomin.
Li hinek deverên Mûşê 10 metre berf heye
Li Mûşê ekîb li 10 gund û 23 mezrayên ku rêya wan ji ber berfê hatiye girtin dixebitin ku rê bên vekirin.
Ekîbên Rêveberiya Xizmetên Rê û Gihandinê ya Îdareya Taybet a Bajêr li bajarê ku stûriya berfê hin cihan gihîştiye 10 metreyan ji bo rêyên girtî vekin dixebitin.
Li bajêr zivistan zehmet derbas dibe, berf û bager heye û hin cihan talûkeya şepeyê xuya dike, lê ekîb di nav van şert û mercên zehmet da xebatên xwe didomînin.
Berpirsê tîmê Hakan Çolak jî ragihand ku ew li ser rêya Uçevlerê ya ku rêya 10 gund û 23 mezrayan digihînin hev dixebitin.
Çolak got: "Berf û bager heye û stûriya berfê hin cihan gihîştiye 10 metreyan. Em dê rêyan vekin û xwe bigihînin gundan. Em kîlometreyekê di nav saetekê de vedikin. Ji ber metirsiya aşûtê ekîbên me pir hesas dixebitin."
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse