Hewlêr (Rûdaw) - Li parêzgeha Riha ya Bakurê Kurdistanê otomobîleke ku 5 jê zarok 6 kes tê de bûn kete kanala ava, piştî xebatên lêgerînê, cenazeyê kesê 5emîn jî hat dîtin û herwiha lêgerîna ji bo zaroka 9 salî jî berdewam e.
Otomobîla bi reqema 31 B 7008 a Hasan Çetîn diajot li nêzîkî Taxa Ulubag a navçeya navendî ya Xelîliyeyê ket kanaleke avdanê.
Li ser agahdarkirinê tîmên tenduristiyê, polîs, ambulans û tîmên lêgerîn û rizgarkirinê ji bo cihê bûyerê hatin şandin. Her wiha ji bo derxistina otomobîlê vînc jî ji bo cihê bûyerê hat rêkirin.
Otomobîla ku hevjîna şofêr Ozlem (31) û zarokên wan Asmîn (11), Aysun (9), Ecem (5), Îbrahîm (4) û Mislim (1) Çetîn ên tê de bûn bi vîncê ji kanala avê hat derxistin.
Di otomobîla ku hate derxistin de cenazeyên 4 zarokan hatin dîtin.
Piştî lêgerînê herî dawiyê cenzayê Ozlem Çetin jî hat dîtin û lêgerîna bo Aysun hêj berdewam e.
Hat gotin ku ku di qezayê de şofêr berî ku bikeve kanala avdanê xwe ji otomobîlê avêtiye. Herwiha hat zanîn ku lingê Hasan Çetîn ê ku rakirin Nexweşxaneya Perwerde û Lêkolînê ya Mehmet Akîf Înan şikestiye.
.jpg&w=3840&q=75)
