Hewlêr (Rûdaw) - Rêveberiya Xweser daxuyaniyek belav kir û êriş komên hikûmeta veguhêz a Sûriyeyê yên li taxên Kurdan ên li Helebê bi tundî şermezar kir.
Rêveberiya Xweser ragihand ku ev êriş sûcên şer in û Tirkiye rasterast jê berpirsyar e.
Rêveberiya Xweser di daxuyaniya xwe de bal kişand ser rewşa taxên Kurdan ên li Helebê, Şêx Meqsûd û Eşrefiyeyê û diyar kir ku komên çekdar ji ber ku nikarin li qadê bi pêş ve biçin dest bi topbarankirina bê ser û ber û bi zanebûn a sivîlan kiriye.
Di daxuyaniyê de hat destnîşankirin ku armancgirtina nexweşxane û navendên tenduristiyê ne şaşiyeke leşkerî ye û wiha hat gotin:
"Em tekez dikin ku armancgirtina dubare ya nexweşxane û navendên tenduristiyê yên li taxên Şêx Meqsûd û Eşrefiyeyê, nabe wekî şaşiyeke leşkerî yan tesadufî were dîtin.
Ev karekî bi zanebûn e û armanca wê ew e ku jiyanê li van taxan felc bikin û şêniyan ji mafê dermankirinê bêpar bihêlin.
Ev yek cewhera sûcdar a van êrişan eşkere dike."
"Tirkiye berpirsyar e"
Rêveberiya Xweser, dewleta Tirkiyeyê wekî berpirsyara sereke ya van êrişan nîşan da û anî ziman:
"Ji ber piştgirî û hêsankariya ji bo van koman, em dewleta Tirk rasterast ji van sûcan berpirsyar dibînin.
Ev yek beşek e ji polîtîkayên wê yên ji bo têkdana aramiya herêmê û şikandina îradeya gelên azad."
Di daxuyaniyê de hat diyarkirin ku beşdariya komên ku sembol û îdeolojiyên DAIŞê hildigirin, nîşan dide ku “ev êriş berdewamiya heman hişmendiya terorîst e” û wiha hat gotin:
"Berdewamiya van sûc û binpêkariyan, metirsiya pêkhatina komkujiyan a li dijî sivîlan zêde dike û dikeve çarçoveya sûcên şer û jenosîdê."
Bangî civaka navneteweyî hat kirin
Rêveberiya Xweser pesnê berxwedana xelkê û Asayîş taxên Kurdan ên li Helebê da û bangî civaka navneteweyî kir:
"Em bangî civaka navneteweyî û hemû sazî û rêxistinên mafên mirovan dikin ku demildest destwerdanê bikin ku dawî li van binpêkariyan bînin, rê li ber sûcdaran bigirin û li gorî yasayên navneteweyî hesab ji wan bixwazin."