Hewlêr (Rûdaw) - Alimê Kurd Dr. Şêx Murşid Maşûq Xeznewî li ser rewşa dawî ya taxên Kurdan ên Helebê peyamek belav kir û bang li Kurdan kir ku li dora hêzên xwe bibin yek.
Dr. Şêx Murşid Maşûq Xeznewî li ser hesabê xwe yê medyaya civakî derbarê rewşa Şêx Meqsûd û Eşrefiyeyê de daxuyaniyek da.
Xeznewî di peyama xwe de amaje bi êşên gel kir û got, "Me li Şêx Meqsûdê gelek êş kişand û tişt winda kirin lê me rêya xwe winda nekiriye û winda nakin."
"Em baweriya xwe bi Mezlûm Ebdî nû dikin"
Alimê Kurd destnîşan kir ku di demên wiha de divê piştgiriya hêzên Kurdan were kirin û wiha pê de çû:
"Rexnekirina HSDyê erk e lê devjêberdana hêzên me ne vebijêrek e.
Em baweriya xwe bi Generalê xwe Mezlûm Ebdî nû dikin û em dê ji bo gel û rûmeta xwe bi israr li ser vê rêyê dimeşin."
"Şiyar bibin û bibin yek"
Xeznewî bal kişand ser hêrsa gel a li hemberî bûyeran û wiha bang kir:
"Ez dizanim kolana Kurdan û gelê me çi qasî hêrs e û ez li gel we me. Lê şiyar bibin û bibin yek, mil bi mil, gelê Kurd û piştgirîya rêberiya xwe bikin.
Nehêlin nakokî bikeve nav me û me bixe nav dafika dijmin. Tevî êşê jî hûn pir hişyartir in."
#GRAFÎK - Şêx Murşid Xeznewî: Em baweriya xwe bi Generalê xwe Mezlûm Ebdî nû dikin
— RudawKurdi (@RudawKurdi) January 11, 2026
🎙️ Şêx Murşid Xeznewî got:
💬 Me li Şêx Meqsûdê gelek êş kişand û tişt winda kirin lê me rêya xwe winda nekiriye û winda nakin
💬 Rexnekirina HSDyê erk e lê devjêberdana hêzên me ne vebijêrek e.… pic.twitter.com/hBmEtpCjKi
Çi bûbû?
Roja sêşema borî Artêşa Ereban a Sûriyeyê êrişî taxên Kurdan ên bajarê Helebê (Şêx Meqsûd û Eşrefiye) kiribû.
Hêzên Ewlehiya Hundirîn a Helebê (Asayîş) ku girêdayî Rêveberiya Xweser e, bersiva êrişan dabû.
Li gorî ajansên Neteweyên Yekbûyî, rayedarên xwecihî û Rewangeha Mafên Mirovan a Sûriyeyê (SOHR), di navbera 140 heta 180 hezar kes ji ber şer koçber bûne.
Her wiha di encama êrişan de nêzîkî 30 kesî canê xwe ji dest daye ku di nav wan de sivîl jî hene û bi dehan kes jî birîndar bûne.
Hêzên navneteweyî, di serî de Amerîka û Neteweyên Yekbûyî, daxwaza kêmkirina aloziyan û parastina sivîlan dikin.