Hewlêr (Rûdaw) – Cîgirê Serokwezîrê Herêma Kurdistanê Qubad Talebanî bi serokatiya şandekê serdana Belcîka û Holandayê dike.
Li gorî agahiyên Rûdawê, biryar e îro duşembî 12ê Hezîrana 2017ê şandeke pilebilind a Hikûmeta Herêma Kurdistanê bi serokatiya Cîgirê Serokwezîr Qubad Talebanî ber bi Ewropayê ve bikeve rê û serdana Becîka û Holandayê bike.
Herwiha biryar e, îro Qubad Talebanî û şanda pê re îro bigihîjin Bruksel a paytexta Belcîkayê.
Nûnerê Hikûmeta Herêma Kurdistanê li Yekîtiya Ewropayê, Dilawer Ajgeyî derbarê serdana wê şanda Kurdistanê de ji Rûdawê re got, ku ev serdan li ser vexwandina fermî ya Yekîtiya Ewropayê, Belcîka û Holandayê ye.
Dilawer Ajgeyî ragihand, Qubad Talebanî di serdana xwe y abo Brukselê de dê bi berpirsên pilebilind ên Yekîtiya Ewropa, Cîgirê Serokwezîrê Belcîka Didier Reynders û Wezîrê Berevaniya Belcîkayê Steven Vandeput hevdîtinan pêk bîne.
Ajgeyî da xuyakirin, ku Qubad Talebanî û şanda Herêma Kurdistanê dê di çarçoveya vê geşta xwe de serdana Holandayê jî bikin û li wî welatî jî bi Wezîrê Derve Bert Koenders û Wezîra Bazirganiya Navdewletî û Geşepêdana Hevkariyê ya Holandayê Lilianne Ploumen re bicivin.
Nûnerê Herêma Kurdistanê li Brukselê tekez kir, Talebanî û şanda pê re piştre dê serdana Parlamentoya Holandayê û Dadgeha Tawanan a Navdewletî jî bikin.
Serdana Cîgirê Serokwezîrê Herêma Kurdistanê bo Ewropayê, piştî serdana her sê wezîrên derve yên Belcîka, Holanda û Luksemburgê bo Kurdistanê tê.
Her yek ji Wezîrê Derve yê Holanda Bert Koenders, Wezîrê Derve yê Belcîka Didier Reynders û Wezîrê Derve yê Luksemburgê Jean Asselborn roja 18ê Kanûna 2016ê bi hev re serdana Herêma Kurdistanê kiribûn û bi Serokê Herêma Kurdistanê Mesûd Barzanî û Serokwezîr Nêçîrvan Barzanî re civiyabûn.
Serdana şanda Kurdistanê bo Ewropayê di demekê de ye, ku Herêma Kurdistanê roja 25ê Îlona îsal weke roja sazdana referanduma serxwebûnê diyar kiriye.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse