Hewlêr (Rûdaw) - Serokatiya Herêma Kurdistanê êrişên Îsraîlê yên li ser Îranê şermezar kirin.
Îsraîlê destê sibehê nêzîkî saet 03:01ê bi mûşekan tesîsên nukleerî û baregehên leşkerî yên Îranê bombebaran kirin.
Wezareta Parastinê ya Îsraîlê ragihand, di encama êrişa wan a asmanî ya berfireh a li ser çend herêmên cuda yên Îranê de, piraniya fermandarên bilind ên Hêza Asmanî ya Supaya Pasdaran hatine kuştin.
Di êrişan de kuştina Fermandarê Supaya Pasdaran Husên Selamî û Sererkanê Giştî yê Îranê Mihemed Baqirî hat piştrastkirin.
Ajansa Tesnîmê ya Îranê navên zanayên nukleerî yên ku hatine kuştin ragihandin ku wiha ne:
“Ebdulhemîd Menûçehr, Ehmed Riza Zulfikarî, Emîr Husên Fiqhî, Motlabîzade, Mihemed Mehdî Tehrançî û Fereydûn Ebasî.”
Artêşa Îsraîlê diyar kiribû ku Fermandarê Hêza Asmanî û Dronî ya Supaya Pasdaran Emîr Hacizade jî hatiye kuştin.
Êrişa Îsraîlê bû sedema bertekên herêmî û navneteweyî.
Serokê Amerîkayê Donald Trump ragihand ku ew ji êrişa Îsraîlê li Îranê agahdar bûye û diyar kir ku ew dê destûrê nedin Îranê ku bibe xwediyê çekên nukleerî.
Serokatiya Herêma Kurdistanê: Em şermezar dikin
Herî dawiyê Serokatiya Herêma Kurdistanê daxuyaniyeke nivîskî belav kir û êriş şermezar kirin û got:
“Em êrişa Îsraîlê ya li ser Komara Îslamî ya Îranê û bikaranîna hêza leşkerî di çareserkirina nakokiyan de şermezar dikin.
Ev bûyerên dawî rewşa aram û istiqrar a herêmê aloztir dikin û dibin gef li ser ewlehî û istiqrara herêmî û navneteweyî.
Rûbirûbûn û tedbîrên leşkerî, rewşê xirabtir dikin.
Di vê dema hestyar de, erkê civaka navneteweyî ye ku reaksiyona bilez û lezgîn nîşan bide û kar bike ku alozî û tevlihevî zêdetir belav nebin û di demeke nêz de pêşiya krîzê bigire.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse