Hewlêr (Rûdaw) - Serokkomarê Îraqê Letîf Reşêd xwest ku Helebce di demeke herî kin de bibe parêzgeh.
Serokkomarê Îraqê Letîf Reşîd di salvegera kîmyabarankirina Helebceyê de peyamek belav kir.
Letîf Reşîd di peyama xwe de got got ku hestkirina bi berpirsiyariya niştimanî û mirovahî ew han dide ku aliyên pêwendîdar teşwîq bike ji bo lezkirina gavên parêzgehakirina Helebceyê.
Serokkomarê Îraqê di peyama xwe de her wiha amaje pê kir ku kîmyabarankirina Helebceyê wijdana cîhanê hejand û pêwîstiya bi hewlên zêdetir û karên hevbeş jî ji bo parastina gelan û garantîkirina azadiyan dubare kir.
Letîf Reşîd tekez kir ku divê civaka navneteweyî rê li ber belavbûna çekên komkujî bigire û hewl bên dayîn ji bo bicihanîna ewlehî û aştiyê li herêmê û cîhanê.
37 sal berê û li 16ê Adara 1988an, hikûmeta wê demê ya Îraqê bi çekên kîmyawî êrişî Helebceyê kir.
Bi wê êrişê herî kêm 5 hezar Kurd şehîd ketin û beşek ji xelkê jî ji ber bandora çekên kîmyawî li ser wan, tûşî nexweşiyên curbicur bûn û heta niha jî şopên nexweşiyê li ser wan heye.
Parêzgehbûna Helebceyê
Sala 2013an serokwezîrê wê demê yê Herêma Kurdistanê Nêçîrvan Barzanî, projeyasaya bi parêzgehbûna Helebceyê pêşkêşî serokwezîrê wê demê yê Îraqê Nûrî Malikî kir û di Encûmena Wezîran de hate pejirandin.
10 sal paşê û di kabîneya Mihemed Şiya Sûdanî de, projeyasayeke çar madeyî şand Parlamentoya Îraqê û di rûniştinekê de bi serokatiya Şaxewan Ebdulla, xwendina yekem jê re hate kirin lê ji ber dijayetiya aliyên Îraqî, dengdan li ser projeyasayê çend caran hate paşxistin.
Her çiqas Hikûmeta Herêma Kurdistanê ji 13-03-2014an ve biryara bi parêzgehbûna Helebceyê derxistiye lê astengiyên Îraqê bûne sedem ku çaremîn parêzgeha Herêma Kurdistanê bê naskirina Bexdayê û budceya taybet bimîne.
Îsal di salvegera kîmyabarankirina Helebceyê de, hikûmeta Îraqê ji bo cara yekem 16ê Adarê kir betlaneya fermî lê ew jî di bin navê "Salvegera sûcên Beasê li dijî gelê Îraqê" ku ji bilî kîmyabarana Helebceyê, Enfal, serhildana Şîeyan, armanckirina partiyên wan û terora zanayên ayînî yên Şîe jî tê de cih digirin.
