Rûdaw
Çoman (Rûdaw) – Gora leşkerekî Iraqî li sînorê Hacî Omeran a ser bi Hewlêrê hat dîtin, ku 35 sal berî niha di şerê Iraq û Îranê de hatiye kuştin.
Iraq û Îran ji bo dîtina termên leşkerên ku di şerê heşt salan ê navbera wan herdu welatan de hatine kuştin û heta niha gelek ji wan nehatine dîtin, lijneyek pêk anîne û li deverên sînorî dest bi karê lêgerîn û lêkolînê dikin. Herdu welatan di şerê heşt salan de zêdetirî milyonek kes ji hev kuştine.
Li gundê Azadî ya li sînorê Hacî Omeran a ser bi Hewlêrê, tîmeke Wezareta Berevaniyê ya Iraqê û Wezareta Şehîdan a Herêma Kurdistanê gorek vekirin. Teqemenî û pereyên ku pê re ne, nîşan didin ku leşkerekî Iraqî bûye.
Rêveberê Gorên Komî yê li Wezareta Şehîdan Bextiyar Ferec ji Rûdawê re ragihand: “Agahî gihişte me ku gorek hatiye dîtin, piştî lêkolînê derket holê ku ew kî ye. Li vir gorên bi vê cureyê gelek in û em ji xelkê daxwaz dikin ku dema tiştekî wisa derkeve, me agahdar bikin.”
Hestî û paşmayî yên kesekî xirîstiyan ê bi navê Îshaq Werdî yê xelkê Erqoş e, niha malbata wî li Awustralyayê niştecih e.
Îla Werdî ku birayê wî leşkerê Iraqî ye, ji Rûdawê re ragihand: “Birayê min di sala 1979an de, bû leşkerê Iraqê û di sala 1983an de me ti agahî jê nestand. Çend roj berî niha bi rêya çend kesên ji navçeya Çomanê em hatin agahdarkirin ku nasname, hestî û paşmayiyên birayê min hatiye dîtin.”
Berpirsê Beşa Windayiyan ê li Wezareta Berevaniya Iraqê Ebas Fazil ji Rûdawê re diyar kir: “Karê lijneyê ew e ku li wan deverên ku heşt sal şer û pevçûn qewimîne, lêgerîn û lêkolînan bikin, heta niha jî bi sedan hestî û paşmayiyên leşkerên Iraq û Îranê li wan deran mane.”
Di şerê heşt salan ê navbera Iraq û Îranê de li axa Başûrê Kurdistanê li ser rûbera 776 kîlometre çargoşe mayîn hatine danîn.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse