Hewlêr (Rûdaw) - Hêzên Sûriyeya Demokratîk (HSD) ragihand ku li Minbic û Kobaniyê agirbest çênebûye.
Dihat zanîn ku Amerîka hewl dide di navbera HSD û komên çekdar ên di kontrola Tirkiyeyê de agirbestekê ragihîne.
Hinek çavkaniyan îdia dikir ku li Minbic û Kobaniyê agirbest hatiye îlankirin.
“Êrişên xwe didomînin”
Navenda Ragihandin û Çapemeniyê ya Hêzên Sûriyeya Demokratîk (HSD) têkildarî mijarê ev daxuyanî da:
“Hewldanên navbeynkariyê yên Amerîkayê yên ji bo agirbesteke mayînde li herêmên Minbic û Kobaniyê, ji ber nêzîkatiya Tirkiyeyê ya li hemberî hewldanan û dûrketina ji qebûlkirina xalên wê yên sereke bi ser neketin.
Ew navbeynkarî ji bo veguhastina şervanên Meclisa Leşkerî yên mayî û sivîlên ku li Minbicê asê mane û yên dixwazin vegerin herêmên ewle yên Bakur û Rojhilatê Sûriyeyê û mijara veguhastina termê Silêman Şah a cihê wê yê berê bûn.
Tevî hewldanên Amerîkayê yên sekinandina şer jî dewleta Tirk û çekdarên wê di van demên dawî de êrişên xwe didomînin."
