Şehîd Keywan Muzefer / Wêne: Rûdaw
Hewlêr (Rûdaw) - Muzefer Gwanî Pêşmergeyê yekem e ku di şerê li dijî DAIŞê de birîndar bûye. Ew 12 sal in li ser cihan e.
Mûşekên Îranê cergê vî Pêşmergeyê dêrîn şewitand.
Keywanê kurê wî, tenê 9 meh bûn zewicîbû û li benda dîtina zarokê xwe yê yekem bû.
Keywan Muzefer dema ku xwest hevsengerên xwe rizgar bike şehîd ket.
“Dengê mûşekeke din hat û telefon girtî bû”
Bavê Keywan 12 sal in ji ber birîneke ku di şerê DAIŞê de birîndar bûbû êşeke giran dikişîne.
Ew tenê ji bo çend xulekan birin şîna kurê wî yê şehîd. Lê ji ber êşa xwe ya zêde ew careke din vegeriya ser cihê xwe.
Muzefer Gwanî ji Rûdawê re bi dengekî xemgîn qala kêliya rûdanê dike û dibêje:
"Ez li malê bûm û min telefonî wî kir. Min jê pirsî, 'Kurê min Keywan tu li kû yî?'
Wî got, 'Mûşek li baregeha me ketiye û em niha diçin cihê mûşekan.'
Di wê kêliyê de dengê mûşekeke din hat. Min dîsa telefonî wî kir lê telefon girtî bû.
Ez çûm nexweşxaneyê, li wir jî nebû. Paşê ji min re gotin kurê te şehîd ketiye."
“Zarokê wê ji dayîk bibe jî dê bibe pêşmerge”
Şehîd Keywan 22 salî bû û tenê 9 meh bûn zewicîbû.
Ew bi kelecan li bendê bû ku di demeke nêzîk de bibe bav.
Şivan Muzefer birayê Keywan e û ew jî wiha qala birayê xwe dike:
"Zarokek di zikê hevjîna wî de ye. Keywan gelekî pê kêfxweş bû.
Min jê re got, 'Keywan dema zarok ji dayîk bû tu dê wî bikî çi?'
Wî jî got, 'Ez dê wî wekî xwe bikim Pêşmerge da ku parastina xak û welatê me bike.'"
Êrişa li baregeha Pêşmergeyan
Berbanga sêşemê êrişeke mûşekî li ser baregeheke Hêzên Pêşmergeyan a li Spîlkê pêk hat.
Di vê êrişê de 6 pêşmerge şehîd ketin û 30 pêşmergeyên din jî birîndar bûn.
Li gorî daxuyaniya Wezareta Pêşmergeyan, Îranê bi 6 mûşekên balîstîk êriş kiriye.
Îranê di du êrişên cuda de êrişî baregehên Hêzên Pêşmergeyan ên li wê deverê kir.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse