Artêşa Tirkiyê berdewam Zinarê Kêste û gundên derdorê topbaran û bombebaran dike
Hewlêr (Rûdaw) - Operasyona arteşa Tirkiyê di nava axa Başûrê Kurdistanê de bi hinceta hebûna gerîlayên PKKê berdewam e û ji şeva borî jî hejmareke gundên sînorî berdewam tên topbaran û bombebarankirin.
Artêşa Tirkiyê berdewam Zinarê Kêste û gundên derdorê topbaran û bombebaran dike û şerên giran ketine gundên Deşîş, Edna û Serero.
Peyamnêrê Rûdawê Nayîf Remezan li nêzikî Zinarê Kêste ragihand, ji sibeha îro ve ti şer û pevçûnekê li navçeyê rû nedaye, lê ji piştî nîvro ve topbaran û bombebarankirina pişta gundê Kêste, Berê Redê, Bêgovan berdewam e û “derdora demjimêr 15.00 jî topek li herêma Zinarê Kêste û rêya Hirûrê ket.”
Ji ber topbaran û bombebarana berdewam a navçeyê, beşeke mezin a pûşê gundê Kêste şewitiye û agir heta nêzikî gund jî hatiye.
Herwiha cara yekem artêşa Tirkiyê derdora gundê Rêwan a li beramber Zinarê Kêste li nêzikî Metîna topbaran kir û bi dirêjahiya şev û roj jî navber bi navber Zinarê Kêste topbaran kir.
Li gor zanyariyan niha şer û pevçûnên dijwar ên gerîlayên PKKê û leşkerên Tirkiyê li gundên Deşîş, Edna û Serero hene.
Wezareta Berevaniya Tirkiyê jî ragihand ku serbazekî wan dema ku xwe ji helîkopterê avêtiye, birîndar bûye û piştre jiyana xw ji dest daye.
PKK jî ragihand ku wan li çend navçeyên cuda di şer û pevçûnan de gerîlayên wan 7 serbazên Tirkiyê kuştine û 2 yên din jî birîndar kirine.
Ev di demekê de ye ku firokeyên Tirkiyê duh gundên Hirurê û pişta geliyê Qumrî bombebara kiribûn.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse