Hewlêr (Rûdaw) - Melayê Kurd Alî Boçnak ku ji ber xwendina mewlûda bi Kurdî hatibû girtin li girtîgehê canê xwe ji dest da.
Li bajarê Qers ê Bakurê Kurdistanê sala 2009an hêzên emnî yên Tirkiyê di çarçova “operasyonên dijî KCKê” hejmarek kes desteser kiribûn û derbarê hejmarek kesan de jî lêpirsîn hatibû destpêkirin.
Melayê Kurd ê bi navê Alî Boçnak jî yek ji wan kesan bû ku lêpirsîn derbarê wî de hatibû destpêkirin û di encama lêpirsînê de dadgehê bi tohmeta ku mewlûda Kurdî xwendiye 7 sal û 8 meh cezayê zindanê dabû Boçnak.
Ew melayê Kurd ê 76 salî piştî ku cezayê wî ji aliyê Dadgeha Bilind ve jî hat pesendkirin, sala 2017an bo zindana Tîpa L ya Patnosê hatibû veguhastin û tevî temenê mezin û rewşa tendirustiya wî ya xirap, ji girtîgehê nehatibû berdan.
Li ser daxwaza malbatê Saziya Pîzişkiya Dadwerî raportek derbarê wî de hatibû amade kiribû û tê de hatibû gotin, “rewşa tendirustiya wî guncaw e” ku di girtîgehê de bimîne.
Lêbelê rewşa wî melayê Kurd li zindanê her ber bi xirabbûnê ve çû û îro li girtîgehê koça dawî kir.
Biryar e termê Alî Boçnak ê 76 salî li Qersê bê xakê bê veşartin.
Partiya Demorkatîk a Gelan (HDP) jî peyamek belav kir û got, “Mirina Alî Boçnak ê 76 salî di girtîgehê de ku ji ber mewlûda Kurdî hatibû girtin û nexweiya giran li gel hebû, tawan e.”
Di peyama HDPê de hatiye gotin, “Mixabin girtiyê nexweş Mele Elî îro li zindanê, ji nav me bar kir. Hêrs û kerba me zêde, azara me giran e. Xwedê bi rehma xwe şa bike, serê malbatê û serê gelê me sax be."
Mixabin girtiyê nexweş Mele Elî îro li zindanê, ji nav me bar kir. Hêrs û kerba me zêde, azara me giran e. Xwedê bi rehma xwe şa bike, serê malbatê û serê gelê me sax be. #AliBoçnak pic.twitter.com/Yz7bDDWfUt
— HDP Kurdî (@KurdiHDP) September 24, 2020
