Hewlêr (Rûdaw) - Hevserokên Giştî yên DEM Partiyê Tulay Hatîmogullari û Tuncer Bakirhan êrişa li dijî mala Serokê Herêma Kurdistanê Nêçîrvan Barzanî şermezar kir.
Hevserokên Giştî yên DEM Partiyê Tulay Hatîmogullari û Tuncer Bakirhan derbarê êrişên îro yên li Dihok û Hewlêrê de daxuyaniyek da.
"Em bi tundî şermezar dikin"
Hatîmogullari û Bakirhan di daxuyaniya xwe de êrişa li dijî mala Serokê Herêma Kurdistanê Nêçîrvan Barzanî şermezar kir û got:
"Em wan êrişan bi tundî şermezar dikin ku îro ji aliyê hêzên girêdayî Îranê ve li Dihok û Hewlêrê hatin kirin.
"Em bombebarankirina mala Rêzdar Nêçîrvan Barzanî jî şermezar dikin û em silametiyê ji Birêvebiriya Herêma Kurdistanê re dixwazin."
"Divê Îran daxuyaniyekê bide"
Hevserokan diyar kir ku ew ji ber êrişên hefteyên dawî yên li Herêma Kurdistanê gelekî dilgiran û xemgîn in.
Tulay Hatîmogullari û Tuncer Bakirhan got:
"Birêvebiriya Îranê êrişên çend roj berê yên li Hewlêrê wekî 'xeletî' pênase kirin û soza lêpirsînê da.
Divê heman birêvebirî ji bo êrişên îro jî demildest daxuyaniyekê bide û pêwîst e cezayên pêwîst bi kar bîne."
"Em dê têkoşîna xwe bidomînin"
Di dawiya daxuyaniyê de behsa bedêlên Herêma Kurdistanê hat kirin û hat gotin:
"Herêma Kurdistanê bi bedêlên mezin gihîştiye van rojan. Eşkere ye ku bi van êrişan tê xwestin ku şer û pevçûn li herêmê jî belav bibin."
Di daxuyaniyê de peyama piştgiriyê hat dayîn:
"Li hemberî vê zîhniyeta ku hewl dide cografyaya Kurdistanê bikişîne nav şer, em dê wekî doh îro jî di nava piştgiriyê de têkoşîna xwe bidomînin."
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse