Hewlêr (Rûdaw) – Serdozgerê Giştî û Şoreşê yê parêzgeha Sine ya Rojhilatê Kurdistanê derbarê veşartina zindaniyên reviyayî de hişyarî da xelkê û ragihand, her kesê ku bi her awayekê alîkariya zindaniyên reviyayî kiribe yan cihê veşartinê ji wan re dabîn kiribe, dê bi tundî were cezakirin.
Mihemed Cebarî ji ajansa fermî ya nûçeyan a Îranê IRNA re axiviye û daxwaz ji girtiyên reviyayî yên zindana Seqizê kiriye, ku xwe radest bikin.
Mihemed Cebarî gotiye, eger zindaniyên reviyayî bixwe û bi insiyatîfa xwe vegerin û xwe radestî hêzên ewlehiyê û aliyên pêwendîdar ên hikûmetê bikin, ew dê derbarê cezayên wan ên nû de, li gor yasayê nermiyê nîşan bidin û cezayeke kêmtir bi ser wan de bisepînin, herwiha hikûmet dê têkildarî cezayên wan ên berê jî wan tevlî lîsteya efûyê bike.
Dozgerê Giştî û Şoreşê yê Sineyê herwiha da xuyakirin, li ser fermana Serokê Desthilata Dadweriyê ya Îranê û Serokê Giştî yê Saziya Dadê ya parêzgeha Sineyê, aliyên pêwendîdar derbarê sedemên bûyera reva girtiyan ji zindana Seqizê de mijûlî lêkolînê ne û got, çend kes têkildarî bûyerê hatine desteserkirin û lêpirsîn bi wan re tê kirin.
Mihemed Cebarî di berdewamiya daxuyaniya xwe de hişyarî da kesên ku di revê yan veşartina girtiyan de alîkariya wan kirine û got: kesên ku bi qestî di berdewamiya reva girtiyên reviyayî de, di dabînkirina wesayit an cihê veşartina wan de alîkarî kiribin, li gor yasayê gunehar tên naskirin û dê bi tundî bihêne sizadan.
Cebarî herwiha red kir, ku ew girtî bi sedema tirsa ji belavbûna vîrusa Koronayê ji zindanê reviyabin û destnîşan kir, heta niha ti haleteke gumankirî yan piştrastkirî ya tûşbûna bi vîrusa Koronayê li zindana Seqizê û zindanên din ên parêzgehê nehatiye tomarkirin.
Roja Înê 27ê Adarê hejmarek gritiyan deriyên zindana Seqizê şikandin û reviyan. Berprisên zindanê û rayedarên Îranê dibêjin, 74 kes ji girtiyên zindana Seqizê di wê bûyerê de reviyane.
Seqiz duyemîn bajarê mezin ê parêzgeha Sineyê ye û nifûsa wê zêdetir ji 226 hezar kesan e.
Dozgerê Giştî û Şoreşê yê Sineyê ragihandiye, ku heta niha 19 kes ji girtiyên reviyayî xwe radestî hikûmetê kirine.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse