Rêbwar Talebanî: Divê Pêşmerge vegerin nav Kerkûkê

Hewlêr (Rûdaw) - Serokê Encûmena Parêzgeha Kerkûkê yê bi wekalet, Rêbwar Talbenaî daxwaz kir ku Pêşmerge û hêzên Asayişê vegerin nav Kerkûkê, daku ewlehiya vê parêzgehê bi temamî bê parastin.

Di daxuyaniyeke taybet de Rêbwar Talebanî ji Rûdawê re ragihand: “Piştî 16ê Oktoberê bi dehan teqîn li Kerkûkê çê bûne, û ew kesên ku hatine nav Kerkûkê, xerîb in û nizanin çawa bajarê Kerkûkê biparêzin û rê li ber êrîşên DAIŞê bigirin.”

Rêbwar Talebanî tekezî li ser vê yekê kir ku vegera Pêşmerge bo nav Kekrûkê karekî destûrî û yasayî ye.

Serokê Encûmena Parêzgeha Kerkûkê da xuyakirin, niha Kerkûk di bin hukmekî serbazî de ye û daxwaza asayîkirina rewşa vê parêzgehê kir.

Şeva bihorî 6 teqînên li pey hev li nav bajarê Kerkûkê çê bûn û li gor agahiyan, di encama wan teqînan de 6 kesan canê xwe ji dest dan û 18 kes jî birîndar bûn.

Piştî teqînan, Serok Barzanî, Serokê Hilbijartî yê Herêma Kurdistanê Nêçîrvan Barzanî û Cîgirê Sekreterê Giştî yê YNKê Kosret Resûl ew teqîn şermezar kirin û daxwaza hemahengî û hevkariya navbera Hêzên Pêşmerge û hêzên ewlehiyê yên Herêma Kurdistanê û Iraqê, asayîkirina rewşa Kerkûkê û vegera Hêzên Pêşmerge bo Kerkûkê kirin.

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger