Hewlêr (Rûdaw) – Serkirdeyekî pilebilindê DAIŞê ku bi esil xelkê Holandayê ye û du postên giring di nava DAIŞê de hebû, li bajarê Mûsilê hat kuştin.
Berpirsê Ragihandina Liqa 14 a Partiya Demokrata Kurdistanê (PDK) li Mûsilê, Seîd Memozînî di dauxyaniyekê de ji Rûdawê re ragihand: “Îro înê 13ê Çileya 2017ê, berpirsekî holandî yê rêxistina DAIŞê hat kuştin.”
Seîd Memozînî got: “Îro înê li Taxa Muhendisîn a bajarê Mûsilê, di şer û pevçûnan de Berpirsê Hêza Înxîmasî (hêza ku heta mirinê şer dike) ya DAIŞê, Ebû Omer Holandî hatiye kuştin.”
Memozînî da xuyakirin: “Navê wî berpirsê holandî yê DAIŞê, Ties Bill Monte bûye û temenê wî jî 41 sal bûye.”
Bi gotina wî berpirsê PDKê, ‘Ebû Omer Holandî’, berpirsê hemû çekdarên biyanî yên nav rêxistina DAIŞê bûye, hevdem dostekî nêzîk ê Xelîfeyê DAIŞê Ebûbekir Bexdadî jî bûye.
Hêza Înxîmasî ew hêz e ku çekdarên wê ji bilî ku çek bi wan re ne û li dijî dijmin şer dikin, lê kmeber an jî êlekên bombekirî jî bi xwe ve girê didin û di demên pêwîst de dibin xwekuj û xwe diteqînin.
Li gorî pêgehên DAIŞê, çekdarên Hêza Înxîmasî ya wê rêxistinê, bi çeka xwe heta dawiyê şer dike, lê eger hat dorpêçkirin û gulle û cebilxane pê re nema, xwe bi hêzên dijmin ve diteqîne, wate bi ti awayî teslîm nabe.
Kuştina wî berpirsê mezin ê DAIŞê di demekê de ye, ku operasyona kontrolkirina Mûsilê didome.
Operasyona Mûsilê 88 roj e ku dest pê bûye û niha jî şerekî giran li navenda bajarê Mûsilê heye.
Di çarçoveya operasyona girtina Mûsilê de, îro înê 13ê Çileya 2017ê hêzên Iraqê baregehên parêzgariyê û Encumena Parêzgeha Mûsilê, Taxa Sedriye, pira duyem a Mûsilê, derwazeya Zanîngeha Mûsilê û çend cihên din kontrol kirin.
Li gorî berpirsên serbazî yên Artêşa Iraqê, heta niha 60 taxên bajarê Mûsilê yên li aliyê rojhilatê vî bajarî ji destê DAIŞê hatine derxistin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse