Hewlêr (Rûdaw) - Serokê Heyva Sor a Îranê Pîrhusên Kolîvend ragihand ku ji destpêka şer ve heta niha 9 hezar û 670 cihên sivîl li herêmên cuda yên Îranê ji aliyê Amerîka û Îsraîlê ve hatine armanckirin.
Pîrhusên Kolîvend bangî saziyên navneteweyî yên wekî Xaça Sor a Navneteweyî, Dozgerê Giştî yê Dadgeha Tawanan a Navneteweyî û Encumena Mafên Mirovan kir ku li "binpêkirinên Îsraîl û Amerîkayê" bipirsin.
Serokê Heyva Sor a Îranê Pîrhusên Kolîvend çû serdana depoyeke petrolê ya li bakurrojavayê Tehranê ku berê sibeha îro bûbû armanca bombebarana dijwar a Amerîka û Îsraîlê û zerereke zêde dîtibû.
"Depoya sotemeniyê hîn jî dişewite"
Pîrhusên Kolîvend got, "Şeva borî êrişî yek ji depoyên sotemeniyê yên Tehranê hat kirin û hat armanckirin.
Agir pê ketiye û heta niha jî dişewite. Ji bilî wê, êrişî çend armancên li başûrrojhilatê Tehranê jî hat kirin û bi temamî ji holê reabûn.
Her wiha barhilgirên sotemeniyê yên li herêmê agir girtin û ji nav çûn."
Kolîvend, Amerîka û Îsraîl bi wê yekê tohmetbar kirin ku cih û deverên sivîl dikin armanc û got:
"Tevî ku dijmin îdia dike ew tenê deverên leşkerî dike armanc jî lê derewan dike.
Heta niha zêdetirî 9 hezar û 670 dever û cihên sivîl hatine armanckirin ku 7 hezar û 943 yekeyên niştecihbûnê, hezar û 617 yekeyên bazirganiyê, 32 navendên tenduristiyê ku nexweşxane û dermanxane jî di nav de ne, 65 dibistanên ku bi temamî wêran bûne û her wiha 12 şaxên Heyva Sor li xwe digire."
Lê belê Fermandarê Fermandariya Navendî ya Artêşa Amerîkayê (CENTCOM) Brad Cooper hişyariyek da xelkê Îranê û got:
"Rejîma Îranê ji bo operasyonên xwe cihên qerebalix bi kar tîne."
"Karmendên tenduristiyê hatin armanckirin"
Serokê Heyva Sor a Îranê her wiha da zanîn:
"Di êrişan de, 7 karmendên Heyva Sor dema ku hewara xwe digihandin û birîndar rizgar dikirin rasterast hatin armanckirin û birîndar bûn.
Her wiha 11 kesên di sektora tenduristiyê de şehîd ketin û 33 kesên din ên ser bi sektora tenduristiyê ve di dema pêşkêşkirina xizmetguzariyan de hatin armanckirin.
Hejmarek ambulans û otomobîlên hawarçûnê yên Heyva Sor jî rasterast bi mûşekan di dema xebatên hawargihandinê de hatin armanckirin û bi temamî ji nav çûn."
Pîrhusên Kolîvend daxwaz ji saziyên navneteweyî yên wekî Xaça Sor a Navneteweyî, Dozgerê Giştî yê Dadgeha Tawanan a Navneteweyî û Encûmena Mafên Mirovan kir ku li binpêkirinên Amerîka û Îsraîlê bipirsin.
Derbarê wê yekê de Kolîvend got, "Ev kiryar binpêkirineke eşkere ya mafên mirovan e.
Min ev hemû binpêkirin bi nameyeke nivîskî û bi belge ji Serokê Komîteya Xaça Sor, Serokê Federasyona Xaça Sor, Dozgerê Giştî yê Dadgeha Tawanan a Navneteweyî, Encûmena Mafên Mirovan û saziyên din ên navneteweyî re şandine da ku lêkolîn li ser van dosyeyan bê kirin û ev sazî rola xwe bilîzin."
Şerê Îsraîl-Amerîka û Îranê ketiye roja nehemîn ku 28ê Sibatê bi êrişeke berfireh a li ser Îranê dest pê kir û heta niha didome.
Li hemberî vê yekê hêzên çekdar ên Îranê jî çendîn caran bi dron û mûşekan êrişî baregehên leşkerî yên Amerîkayê yên li herêmê û Îsraîlê kiriye.
Li gorî Heyva Sor a Îranê amara xisaran:
- Yekeyên niştecihbûnê: 7 hezar û 943 yeke.
- Yekeyên bazirganiyê: Hezar û 617 yeke.
- Navendên perwerdeyê (dibistan): 65 navend.
- Navendên derman û tenduristiyê: 32 navend.
- Baregehên Heyva Sor: 13 baregeh.
Xisara amûr û otomobîlan:
Li gorî raporê, 28 amûrên hawargihandinê têk çûne yan jî zerer dîtine, ji wan:
- 15 otomobîlên operasyon û hawargihandinê.
- 13 ambulansên ser bi Heyva Sor û hawargihandina bilez.
Ev rapora Heyva Sor a Îranê di bin sernavê "Amara tawanên şer ên Amerîka û rejîma Siyonîst ên li dijî sivîlên Îranê" de hatiye belavkirin, wekî amajeyekê ji bo wan aloziyên leşkerî yên ku li herêmê hene.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse