Hewlêr (Rûdaw) - Sekreterê Encumena Bilind a Ewlehiya Niştimanî ya Îranê Elî Larîcanî nameyeke ku ji 6 xalan pêk tê ji misilmanên cîhanê û dewletên misilman re şand.
Elî Larîcanî di nameyê de ji ber bêdengiya wan a li hemberî êrişên li Îranê rexneyên tund li welatên Îslamî girtin.
Larîcanî her wiha got, "Neyeta Îranê nîne ku desthilata xwe bisepîne, tenê xwe wekî xêrxwaza herêmê nîşan dide."
Elî Larîcanî di nameya xwe ya ku 16 rojan piştî mirina Rêberê Komara Îslamî ya Îranê Elî Xaminêyî hatiye belavkirin de amaje bi hinek mijaran kir.
Wî da zanîn ku welatê wî rûbirûyî "planeke fêlbazane" ya Amerîka û Îsraîlê bûye û mebesta wan perçekirina Îranê ye.
"Welatên Îslamî alîkariya me nekir"
Larîcanî di xalên duyem û sêyem ên nameya xwe de helwesta welatên Îslamî rexne kir û got:
"Ji xeynî çend rewşên kêm, ti dewleteke Îslamî bi hawara gelê Îranê ve nehat."
Wî berpirsê Îranê hedîseke Pêxemberê Îslamê (s.x) wekî belge nîşan da û pirsî:
"Eger hûn bersiva hewara misilmanekî nedin, hûn ne misilman in. Naxwe ev çi cure misilmantî ye?"
Bersivdana êrişan a ji xaka welatên cîran
Larîcanî li ser êrişên Îranê yên li baregehên Amerîkayê yên li welatên herêmê jî peyam da û wiha anî zimên:
"Hinek welat dibêjin ji ber ku me berjewendiyên Amerîka û Îsraîlê yên li xaka wan kirine armanc, naxwe Îran dijmin e!
Gelo dema ku ji baregehên Amerîkayê yên li nava xaka we êrişî Îranê tê kirin, divê Îran bêdeng bimîne?"
Larîcanî ji welatên herêmê xwest ku helwesta xwe diyar bikin bê ka ew di kîjan eniyê de ne.
"Amerîka bêwefa ye"
Larîcanî di xala pêncem a nameya xwe de hişyarî da welatên herêmê û pê de çû:
"Ti wefayeke Amerîkayê ji bo we nîne û Îsraîl jî dijminê we ye. Xulekekê li ser paşeroja herêmê bifikirin."
Larîcanî her wiha tekez kir ku nêta Îranê ya "sepandina desthilatê" li ser ti welatekî cîran nîne û Îran tenê aştî û xêrxwaziyê dixwaze.
Larîcanî di dawiya nameya xwe de banga "Yekîtiya Umeta Îslamî" kir.
Wî ragihand ku tenê bi yekgirtîbûn û hevahengiya hemû aliyan, ewlehî, serxwebûn û bipêşketina welatên herêmê dikarin werin garantîkirin.
Amerîka û Îsraîl ji 28ê Sibatê ve êrişî Îranê dikin.
Îranê jî yekser bersiva wan êrişan da û piraniya wan welatên Ereban û Îslamî bombebaran kirin ku baregehên hêzên Amerîkayê li wan hene.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse