Hewlêr (Rûdaw) - Supaya Pasdaran a Îranê ragihand ku wan li esmanê welêt derb li balafireke şer a Îsraîlê ya cureya F-16 xistiye.
Şerê di navbera Amerîka-Îsraîl û Îranê de ji 28ê Sibatê ve li tevahiya herêmê belav bûye.
Malpera "Sepah News"ê a Supaya Pasdaran ragihand, "Balafireke şer a dijmin a cureya F-16 a ser bi rejîma Siyonîst ve, saet 03:45ê ber destê sibehê li navenda Îranê derb xwariye."
Artêşa Îsraîlê beriya wê daxuyaniyê gotibû ku mûşekeke zemîn-esman ber bi balafireke Îsraîlê ve hatiye avêtin lê amaje bi cureya balafê nekiribû.
Artêşa Îsraîlê got, "Ti ziyan negihiştiye balafê." Lê belê hêj ne zelal e ka her du alî qala heman bûyerê dikin an na.
Medyaya Îranê wêneyek belav kiriye ku dûman li esman nîşan dide û îdia dike ku balafireke din jî bûye armanc.
Lê belê ne cureya wê û ne jî ew yek diyar kiriye ka balafir a Îsraîlê ye yan a Amerîkayê ye.
Îdiaya li ser F-35ê
Ev nûçe çend roj piştî wê yekê tên ku Supaya Pasdaran ragihandibû ku wan li esmanê navenda Îranê derb balafireke Amerîkayê ya cureya F-35 xistiye û "ziyaneke mezin gihîştiye wê."
Derbarê vê mijarê de, tora nûçeyan a CNNê pêncşemê ji zarê du çavkaniyên agahdar ragihand ku balafireke F-35 a Amerîkayê piştî ku "tê bawerkirin ji aliyê Îraniyan ve" hatiye lêdan, neçar maye li baregeheke esmanî ya Amerîkayê ya li Rojhilata Navîn dakeve.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse