Hêdî hêdî dikandarên Mûsilê vedigerin û dest bi nûjenkirina dikanên xwe kirin
Hwelêr (Rûdaw) – Şerê kontrolkirina bajêrê Mûsilê ziyaneke zêde gihand bazarê, lê niha hêdî hêdî dikandar vedigerin û dest bi nûjenkirina dikanên xwe kirin.
Bajarê Mûsilê 10ê Hezîrana 2014an ket destê DAIŞê û li Tîrmeha 2017ê ji aliyê hêzên ewlekariyê yên Iraqê ve bi piştgiriya Hevpeymaniya Navdewletî hat kontrolkirin. bajar wêraniyek mezin dema DAIŞê û piştî kontirolkirina wê jî dît.
Bazara naskirî ya Musilê, ya Hesinger û dartaşan vedigere bo serdema Osmaniyan, gelek pirsgirêkên mezin bo wî bazarî dirust bûne û ya herî dawî jî, ligel kontrolkirina Mûsilê ji aliyê DAIŞê ve di sala 2014an de bû.
Kûr germ in û hesinger jî bi karên xwe ve mijûl in. Bazara Mûsilê wek "Bazara Hesinger û Xeratan" tê naskirin û dîroka çêkirina wê vedigere serdema Osmaniyan. Di vê demê de, bazara navbirî rûbirûyê gelek pirsgirêkên mezin bûye û ya herî dawî jî ligel kontrolkirina Mûsilê ji aliyê DAIŞê ve di sala 2014an de bû. Şerê kontrolkirina bajêr zerareke zêde gihand bazarê, lê piştre dikandar vegeriyan û dest bi nûjenkirina dikan an jî firoşgehên xwe kirin.
Derbarê vê yekê de Hesinger Mihemed Şakir wiha got: “Em vegeriyan û bi hewldanên xwe me dikanên xwe vekirin. Yek yek me hemû firoşgehên xwe vekirin, heta bazar bi tevahî hat vekirin. Li vê bazarê du cor kes kar dikin, ew jî hesinger û xerat in û herdû jî hevdû temam dikin. Mebesta min ew e, em pişta xwe bi wan girêdidin û ew jî bi me."
Rojane hesinger û xerat bi temamkirina karên xwe ve mijûl in, lê her kî ji wan biaxife, zêde hikûmeta Iraqê rexne dikin. Ew dibêjin, DAIŞê zerareke zêde gihandiye wan û di operasyona kontrolkirina Mûsilê û encama şerê navbera hêzên ewlekariyê yên Iraqê û çekdarên DAIŞê de dikanên wan herifîn, lê hikûmeta Iraqê bo nûjenkirinê ti hevkariyek pêşkêşî wan nekiriye.
Hesinger Xalid Zeîn jî got: “Piştî operasyona azadkirinê, em vegeriyan bazarê û me bi xwe ev der paqij kir. Me bi hewl û pereyên xwe dest bi çêkirina dikanên xwe kir. Bi vî awayî jî me karî careke din jiyanê vegerînin vê derê û careke din jî dest bi karkirinê bikin."
Gelek kes ji bo bidestxistina debara xwe ya rojane û mal û zarokên xwe li vê bazarê kar dikin. Ew dibêjin, bav û bapîrên wan jî li vê derê kar kirine û naxwazin bicîh bihêlin.
Xerat Yûsif Ebdulla jî anî ziman: “Em li navçeya deriyê pira kevin in. Ev yek ji bazarên qedîm ên Mûsilê ye. Piraniya dikanên vê derê yên hesingerî û xeratiyê ne. Malbata min zêdeyî 200 sal e li vê derê dijî û pênc nifşên me di vî pîşeyî de kar kirine."
Bajarê Mûsilê 10ê Hezîrana 2014an ket destê DAIŞê û Temûza 2017ê ji aliyê hêzên ewlekariyê yên Iraqê ve bi piştgiriya Hevpeymaniya Navdewletî hat kontrolkirin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse