Hewlêr (Rûdaw) - Birêvebiriya Amerîkayê derbarê karmendên xwe yên dîplomatîk ên li Tirkiyeyê de biryareke girîng a ewlehiyê da.
Wezareta Karên Derve ya Amerîkayê ferman da karmendên konsulxaneya Edeneyê û malbatên wan da ku ji bajêr derkevin.
Li gorî agahiyên ku di çapemeniya Amerîkayê de hatine belavkirin, ev biryar ji ber "zêdebûna metirsiyên ewlehiyê yên li herêmê" hatiye girtin.
Karmendên Amerîkî tên vekişandin
Birêvebiriya Amerîkayê ji karmendên konsulxaneyê yên li Edeneyê û malbatên wan xwestiye ku demildest ji bajar derkevin.
Edene ji bo Amerîkayê wekî yek ji navendên xwedî girîngiya stratejîk tê naskirin.
Her wiha ji ber nêzîkbûna wê ya bi Baregeha Asmanî ya Încîrlîkê re ku di çarçoveya NATOyê de tê bikaranîn, wekî yek ji nuqteyên dîplomatîk ên herî girîng ên Washingtonê yên li herêmê tê dîtin.
Hişyariya geştê
Li gorî nûçeya ajansa Reutersê, biryar ne tenê bi karmendên dîplomatîk re sînordar maye.
Wezareta Karên Derve ya Amerîkayê ji bo hevwelatiyên Amerîkayî hişyariyeke nû ya geştê belav kir û bangî wan kir ku neçin parêzgehên başûrrojhilatê Tirkiyeyê.
Her wiha ji wan hevwelatiyên Amerîkayî yên li herêmê jî hat xwestin ku "di demeke herî kurt de ji herêmê derkevin."
Ewlehî û metirsiya şer
Rayedarên Amerîkayê sedemên vê biryarê wiha rêz kirin:
- Zêdebûna metirsiyên ewlehiyê û nebûna aramiyê li herêmê.
- Îhtimala şerê çekdarî.
- Metirsiya desteserkirina keyfî ji bo welatiyên Amerîkayî.
Ev biryara Amerîkayê piştî zêdebûna aloziya di navbera Amerîka, Îsraîl û Îranê ya li Rojhilata Navîn balê dikişîne.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse