Hewlêr (Rûdaw) - Serokê Ragihandinê yê Tirkiyeyê Burhanettîn Duran eşkere kir ku mûşekeke balîstîk ji Îranê hatiye avêtin û ber bi Tirkiyeyê ve çûye.
Duran da zanîn ku ew mûşek li asmanê navçeya Şahînbegê ya Dîlokê ji aliyê yekîneyên parastina asmanî û mûşekî yên NATOyê ve hatiye îmhakirin.
Duran diyar kir ku di bûyerê de ti ziyanên canî çênebûne û kes birîndar nebûye.
Burhanettîn Duran li ser hesabê xwe yê medyaya civakî hûrgiliyên operasyonê parve kirin û got:
"Mûşekeke balîstîk ku hatibû tespîtkirin ji Îranê hatiye avêtin û ber bi welatê me ve tê, li asmanê navçeya Şahînbegê ya Dîlokê ji aliyê yekîneyên parastina asmanî û mûşekî yên NATOyê ve di dema xwe de hat astengkirin û bêbandorkirin."
Duran tekez kir ku piştî hewla êrişê Wezareta Parastinê ya Tirkiyeyê û hemû saziyên pêwendîdar di nava hevahengiyeke temam de tedbîrên ewlehiyê xistine dewrê.
Hişyariya tund a ji bo Îranê: Sivîlan nexin metirsiyê
Serokê Ragihandinê Duran diyar kir ku nabe şerê li herêmê li qadeke berfireh belav bibe û ev hişyarî li Tehranê ducare kir:
"Gelekî girîng e ku aloziya li herêmê zêdetir nebe û pevçûn li qadeke berfirehtir belav nebin.
Em careke din bi tundî hişyariya xwe ducare dikin ku divê hemû alî û bi taybetî jî Îran ji wan kiryarên ku ewlehiya herêmî dixin rîskê û metirsiyê li ser sivîlan çêdikin, dûr bisekinin."
"Kapasîteya me di asta herî jor de ye"
Duran bal kişand ser biryardariya Tirkiyeyê ya di mijara parastina ewlehiya sînor û qada asmanî de û got:
"Di mijara parastina qada asmanî û ewlehiya sînor de îrade û kapasîteya dewleta me di asta herî jor de ye."
Hişyariya dezenformasyonê
Duran di dawiya daxuyaniya xwe de bangî welatiyan û dezgehên medyayê jî kir.
Duran bi bîr xist ku divê li hemberî parvekirinên ku dezenformasyonê li xwe digirin baldar bin.
Duran daxuyaniya xwe wiha bi dawî kir:
"Em bi girîngî ji welatiyên xwe û dezgehên medyayê daxwaz dikin ku li hemberî naverokên ku pêwîstiya wan bi piştrastkirinê heye û dikarin raya giştî ber bi tirs û xofê ve bibin baldar bin.
Em ji wan daxwaz dikin ku tenê daxuyaniyên saziyên me yên fermî wekî bingeh wergirin."
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse