Hewlêr (Rûdaw) - Serokê Herêma Kurdistanê Nêçîrvan Barzanî di çarçoveya beşdariya xwe ya di Foruma Dîplomasiyê ya Antalyayê de bi Wezîrê Parastinê yê Tirkiyeyê Yaşar Guler re civiya û pirsa aramî û ewlehiya herêmê gotûbêj kir.
Serokatiya Herêma Kurdistanê li ser civînê daxuyaniyek belav kir.
Li gorî daxuyaniya Serokatiya Herêma Kurdistanê, di hevdîtina Nêçîrvan Barzanî û Yaşar Guler a danê sibehê de pêşhatên dawî yên herêmê, bi giştî û bandor û encamên wan hatin gotûbêjkirin.
Serokatiya Herêma Kurdistanê da zanîn ku her du aliyan tekezî li ser girîngiya berdewamiya agirbestê, pêkanîna aştiyê û parastina aramiyê ya li Rojhilata Navîn kir.
Li gorî daxuyaniyê, di civînê de Wezîrê Parastinê yê Tirkiyeyê "pesnê rola Nêçîrvan Barzanî da" û helwesta Herêma Kurdistanê bilind nirxand ku "nebûye beşek ji şer û aloziyên herêmê."
Yaşar Guler her wiha tekezî li ser pêwîstiya hevahengiya piralî ya ji bo parastina aramiya herêmê kir.
"Herêma Kurdistanê dê wekî her tim faktora aramiyê be"
Serokatiya Herêma Kurdistanê diyar kir, Nêçîrvan Barzanî ducare kir ku Herêma Kurdistanê dê wekî her tim "faktora aramiyê be" û tekez kir ku ew dixwazin pêwendiyên xwe bi welatên cîran re li ser bingeha berjewendiyên hevbeş zêdetir bi pêş bixin.
Mijareke din a civînê jî taybet bû bi pêwendiyên Tirkiyeyê yên bi Îraq û Herêma Kurdistanê re û çawaniya bipêşxistina hevkariya hevbeş a di navbera wan a di warên cuda de.
Foruma Dîplomasiyê ya Antalyayê ya ku doh bi beşdariya serok û serkirdeyên cîhanê dest pê kir dê sibe bi dawî bibe.
#VÎDEO - Nêçîrvan Barzanî û Yaşar Guler civiyan
— RudawKurdi (@RudawKurdi) April 18, 2026
💢 Serokê Herêma Kurdistanê Nêçîrvan Barzanî di çarçoveya Foruma Dîplomasiyê ya Antalyayê de bi Wezîrê Parastinê yê Tirkiyeyê Yaşar Guler re civiya#AntalyaDiplomacyForum #NêçîrvanBarzanî pic.twitter.com/lbWz2cHclG
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse