Îtalya (Rûdaw) – Mujdeya ku ji keştiya binavbûyî rizgar bûye behsa windabûna hevjînê xwe û zarokên xwe kir.
17ê Hezîranê keştiyeke penaberan li nêzîkî girava Lampedusayê bin av bûbû 51 koçber hatibûn rizgarkirin û 10 koçber jî xeniqîbûn.
Li aliyê din, Hêza Deryayî ya Îtalyayê 18ê Hezîranê jî diyar ku keştiyeke penaberan li girava Calabriyayê bin av bûye.
Xaça Sor a Îtalyayê ji Rûdawê re eşkere kiribû ku heta niha 75 koçberên ku di wan 2 keştiyan de bûne winda ne.
Rûdawê piştrast kir ku 19 penaber Kurd in û xelkê Hewlêr û Raperînê ne.
Mujde jî jineke Kurd e û ji keştiya binavbûyî rizgar bûye lê hevjînê wê û 3 zarokên wê winda ne.
“Ji destê min filitîn û çûn”
Mujde Umer li nexweşxaneyeke Îtalyayê ji Nûçegihanê Rûdawê Zinar Şîno re axivî.
“Bi min re bûn, ji destê min filitîn û çûn. Kurê xwişka min, keça xwişka min… Hemû li ber çavên min çûn.”
Mujdeyê diyar kir ku dema kaptan hewl daye hinek tiştan derxe keştî qul bûye û av ketiyê keştiyê.
Li gorî ku ew dibêje hinek kes di nava 5 xulekan de xeniqîne.
“Li ser milê min hişk bûn”
Mujdeya dilşewat behsa wê rewşa zehmet kir û got:
“Her tiştî di nava kêliyekê de rû da. Ez 4 rojan bê nan û bê av di nava deryayê de mam. Hemû ji têhna mirin.
Keça min û hevjînê min jê bê avî dikir hawar û gazî û wan digot, ‘Av, av’.
Kurê min xwarzêyê min li ser milê min hişk bûn. Du şevan wilo man.”
Mujde jineke Kurd e û ji keştiya binavbûyî rizgar bûye
— RudawKurdi (@RudawKurdi) June 20, 2024
🛑 Hevjînê wê û 3 zarokên wê winda ne
🎤 Mujde: Hemû ji têhna mirin, tevan dikir hawar û digot "Av, av" pic.twitter.com/At4fEDO9Ep
Nûnera Herêma Kurdistanê ya Îtalyayê Rêzan Hemesalihê da zanîn ku 67 kes di keştiya binavbûyî de 67 kes hebûn û 11 ji wan hatine rizgarkirin.
Li hêla din, yek ji wan kesa ku ji keştiyê rizgar bûye Ruya Mihyedînî ye.
Ruya Mihyedînî 22 salî ye û ji bajarê Paweyê yê Rojhilatê Kurdistanê ye.
