شرۆڤەکارێک: تووشی سەرسووڕمان نابین ئەگەر نرخی زێر بگاتە 3800 دۆلار

 

هۆکاری دابەزینی نرخی زێڕ بۆ پرۆسەی کۆکردنەوەی قازانج لەلایەن بازرگانانەوە دەگەڕێتەوە. نرخی زێڕ لە گرێبەستەکانی داهاتوودا، ئەمڕۆ بەڕێژەی 0.8٪ دابەزی و ئۆنسەیەکی بە 3605 دۆلار مامەڵەی پێوەکرا.

 

برایان لان، بەڕێوەبەری جێبەجێکاری کۆمپانیای راوێژکاری رایگەیاند، "ئێمە هەندێ پرۆسەی کۆکردنەوەی قازانج لەلایەن بازرگانانەوە دەبینین، بەڵام هێشتا ئاراستەی نرخی زێڕ بەرەو بەرزبوونەوەیە."

 

ئەو شارەزایە دەڵێت، "ئەگەری کەمکردنەوەی سوودی بانکی و نیگەرانی لە لەدەستچوونی سەربەخۆیی بانکی ناوەندیی ئەمریکا، بەهۆی هەڕەشەکانی دۆناڵد ترەمپ، سەرۆکی ئەمریکا، بەردەوام پاڵپشتی بۆ نرخی زێڕ دروستدەکات."

 

ئەو شرۆڤەکارە دەڵێت، تووشی سەرسووڕمان نابن ئەگەر نرخی ئۆنسەیەک زێڕ لە ماوەیەکی کەمدا بەرزبێتەوە بۆ 3800 دۆلار.

 

وەزارەتی کاری ئەمریکا رایگەیاند، "ژمارەی هەلەکانی کارکردن لە مانگی 7دا زیاتر لە ئاستی چاوەڕوانییەکان دابەزیون بۆ 7.181 ملیۆن هەلیکاری نوێ."

 

سستبوونەوەی بازاڕی کاری ئەمریکا، بانکی ناوەندیی ئەو وڵاتە زیاتر هاندەدات سوودی بانکی لە کۆبوونەوەی داهاتووی بانکەکە لە رۆژی 17 ـی ئەم مانگە دابەزێنێت.