رووداو- هەولێر
شەپۆلێكی تووندی سەرما زۆربەی ناوچەكانی رۆژئاوای كوردستان دەگرێتەوە، لەگەڵ هاتنی ئەو شەپۆلەش قەیرانی سووتەمەنی لە رۆژئاوای كوردستان سەرهەڵدەدات. چاودێرێك لە رۆژئاوای كوردستانەوە دەڵێت، قەیرانەكە لەلایەن پارتی یەكێتی دیموكراتەوە دروستكراوە كە لەوێ دەسەڵاتدارە.
قەیرانی سووتەمەنی لە رۆژئاوای كوردستان لە كاتێكدا تووند دەبێت كە ئەو ناوچەیە سەرچاوەی سووتەمەنیی سووریایە بە تایبەتی شاری رمێلان.
شیار عیسا، شرۆڤەكاری كورد لە رۆژئاوای كوردستان هۆكاری دروستبوونی ئەو قەیرانەی روونكردەوە و گوتی "پەیەدە بۆ مەبەستی سیاسی دۆسیەی دابەشكردنی سووتەمەنی بە تایبەت گازوایلی رادەستی كۆمۆنەكانی خۆی كردووە، خەڵكی پابەند كردووە، تەنیا سووتەمەنی لە كۆمۆنەكانی ئەوان وەربگرن".
شیار عیسا، كە لە شاری قامشلۆ چاپخانەیەكی هەیە، گوتی "كۆمۆنەكانی پەیەدە بە پلەی یەكەم سووتەمەنی دەدەنە لایەنگرانی خۆیان، بەڵام زۆرینەی خەڵك پەیوەندییان لەگەڵ كۆمۆن نییە، بۆیە لە سووتەمەنی بێبەش دەبن".
پەیوەندیی پەیەدە بە خەڵكی رۆژئاوای كوردستانەوە لەڕێگەی ئەو ئەنجوومەنانەیە كە پەیەدە دروستی كردوون و لە رۆژئاوای كوردستان پێیاندەگوترێ "كۆمۆن". لە سەرجەم گەڕەك و گوندەكانی رۆژئاوای كوردستان پەیەدە كۆمۆنی دامەزراندووە، ئەم كۆمۆنانە هەفتانە راپۆرتی خۆیان پێشكەش دەكەن، لە بواری ئابووری، سیاسی و كۆمەڵایەتی، لەسەر بنچینەی ئەم راپۆرتانە پەیەدە مامەڵە لەگەڵ خەڵكی ناوچەكان دەكات.
بۆ نموونە لەبارەی باج و داهات لە وەرزی دروێنەی گەنمدا، كۆمۆنی هەر گوندێك راپۆرتی خۆی لەسەر داهاتی خەڵك لە بەرهەمی گەنم دەداتە ئاسایش، ئەوانیش بەپێی داهاتەكە باج لە گوندنشینان وەردەگرن.
چەند دانیشتوویەكی شارەكانی عاموودا و دەربێسیێ دەڵێن ئەگەر داوای سووتەمەنی لە كۆمۆنەكانی پەیەدە بكەن، ئەوا دەبێ بەشداری لە چالاكییەكانی پەیەدە بكەن و ببنە بەشێك لە رێكخستنەكانی ئەو پارتە.
شوفێری پاكسێك لە گەراجی دربێسیێ بە (رووداو)ی راگەیاند "خەڵك دەتوانن بەرگەی سەرما بگرن و نەچنە ژێر باری داواكاریی كۆمۆنەكان و سووتەمەنی وەرنەگرن، بەڵام شوفێری پاسەكان ناتوانن، ئەگەر مانگانە دوو سێ جار پاسەكانیان نەخەنە خزمەتی پەیەدە، ئەوا لە گەراج دەردەكرێن".
سەبارەت بەو كارانەی بۆ پەیەدەی دەكەن، ئەو شوفێرە كە نەیویست ناوی بڵاوبكرێتەوە گوتی "بە هەماهەنگی و لەسەر داوای كۆمۆنەكان، خەڵك دەگوازینەوە بۆ میتینگەكانی پەیەدە لە عاموودا و قامشلۆ".
نەوتی رمێلان چی لێدێت؟
(رووداو) لەزاری چەند سەرچاوەیەكەوە لە كۆمپانیای نەوتی رمێلان زانیویەتی، تاوەكو ئێستاش ئەو كۆمپانیایە سەر بە حكومەتی سووریایە و بڕیار و رێنماییەكانی حكومەت جێبەجێ دەكات.
كارمەندێكی ئەو كۆمپانیایە بە (رووداو)ی راگەیاند "بەپێی رێككەوتنی نێوان حكومەت و پەیەدە، دەبێ نەوتەكە لە نێوان هەردوولا دابەش بكرێ، بەشی حكومەتی سووریا دەچێتە گەڕەكی تەی لە قامشلۆ كە لایەنگری حكومەتن و گەڕەكەكەش لەژێر دەستی حكومەتدایە، بەشێكیشی رەوانەی پارێزگاكانی دیمەشق، تەرتوس و حەلەب دەكرێت.
شیار عیسا دەڵێت دانیشتووانی گەڕەكی تەی كە لایەنگری رژێمن، كێشەی سووتەمەنییان نییە. عیسا گوتی "پەیەدە لەو گەڕەكە كۆمۆنی نییە، رژێم ئەو سووتەمەنییەی لە رمێلانەوە بۆی دەچێت، دابەشی سەر دانیشتووانی گەڕەكەكەی دەكات، بۆیە ئێستا زۆربەی خەڵكی قامشلۆ دەچنە گەڕەكی تەی و لەوێ سووتەمەنی دەكڕن".
شیار عیسا بەسەرهاتێكی خۆی گێڕایەوە و گوتی "لەو رۆژانە منداڵێكمان بوو، هەموو بەنزینخانەكانی قامشلۆ گەڕام قەترەیەك بەنزینم دەستنەكەوت، بۆیە بە ناچاری چووم بۆ گەڕەكی تەی و لەوێ بەنزینم كڕی. لەو گەڕەكە قەیرانی سووتەمەنی نییە، رۆژانە بە تەنكەر سووتەمەنی دێت بۆ گەڕەكەكە".
"گەندەڵی لە كۆمۆنەكان"
ئێستا لە رۆژئاوای كوردستان قسە لەسەر قۆرخكردنی سووتەمەنی لەنێو كۆمۆنەكانی پەیەدە دەكرێت. ئەندامی یەكێ لە كۆمۆنەكانی پەیەدە كە نەیویست ناوی بڵاوبكرێتەوە، بە (رووداو)ی گوت "من ئەندامی پەیەدە نیم، بەڵام بۆ بژێویی ژیانم ناچارم لەگەڵ كۆمۆنەكان كار بكەم، بە داخەوە ستراتیژییەتی پابەندكردنی هاووڵاتیان بۆ ئەوەی كۆمۆن ببێتە سەرچاوەی ژیانیان، بووەتە هۆی ئەوەی سووكایەتی بە خەڵك بكرێ، وای لێهاتووە كوردی قامشلۆ لەسەر شۆستەكانی گەڕەكی تەی كە عەرەبنشینە، چاوەڕێی چەند لیترێك گازوایل بكەن".
ئەندامەكەی كۆمۆنی پەیەدە لە قامشلۆ گوتیشی "سووتەمەنی زۆرە، بەڵام ناچێتە بەنزینخانەكان. لە نێو ئەندامانی كۆمۆنیش گەندەڵی پەیدا بووە، سووتەمەنی تەنیا دەدەنە ئەو كەسانەی لێیان نزیكن. سووتەمەنی دەدەنە ئەوانەش كە لایەنگری پەیەدە نین، بەڵام بە نرخێكی گران".
نرخی لیترێك گازوایل لە رۆژئاوای كوردستان گەیشتووەتە سەرووی 100 لیرەی سووری، بەڵام لە كۆمۆنەكان هەر لیترێك گازوایل بە 40 لیرە دەدرێتە هاووڵاتییان.
پەیەدە نایشارێتەوە كە قەیرانی سووتەمەنی لە رۆژئاوای كوردستان هەیە. عەبدولكەریم سارۆخان، هاوسەرۆكی ئەنجوومەنی جێبەجێكاری كانتۆنی جەزیرە، بە میدیا لۆكاڵییەكانی رۆژئاوای كوردستانی راگەیاندووە، بەمنزیكانە قەیرانی سووتەمەنی چارەسەر دەكەن. گلەیی لە خەڵكیش كرد كە لەسەرەتای وەرزی زستان نەچوونەتە لای كۆمۆنەكان بۆ وەرگرتنی سووتەمەنی.
قەیرانی سووتەمەنی بووەتە هۆی ئەوەی منداڵێكی زۆر نەخۆش بكەون. شیرین خەلیل كە پزیشكی منداڵانە لە شاری قامشلۆ بە (رووداو)ی راگەیاند "ئێستا بەردەوام منداڵ دەهێنن بۆ نۆرینگەكان، زۆربەی ئەو منداڵانە بەهۆی سەرماوە تووشی هەوكردنی قورگ و سینگ بوون، كەسوكاری ئەو منداڵانە دەڵێن پارەیان نییە سووتەمەنی بكڕن و منداڵەكانیانی پێ گەرم بكەنەوە".
داڕشتنەوە: حەکیم داود
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ