نرخی نەوت لە ماوەی یەک هەفتەدا 1.8% دابەزی

 

 

بازاڕی نەوت رووبەڕووی کەمبوونەوەی خواست لەلایەن چینەوە بووەتەوە، کە گەورەترین هاوردەکاری نەوتی خاوە لە جیهان، تەنانەت لەدوای درێژکردنەوەی رێککەوتنی کەمکردنەوەی ئاستی بەرهەمهێنانی نەوت لەلایەن بەرهەمهێنەرانی ئۆپێک پڵەسەوە، نرخی نەوت هەفتەی رابردوو بەردەوام بوو لە دابەزین.

 

نرخی نەوتی برێنت لەکاتی داخستنی بازاڕەکان لە کاژێر 01:00ی بەرەبەیانی رۆژی شەممە، 88 سەنت دابەزی و یەک بەرمیل بە 82 دۆلار و 8 سەنت مامەڵەی پێوەکرا.

 

نرخی نەوتی سووکی تەکساسی ئەمریکاش 92 سەنت دابەزی و بە 78 دۆلار و 1 سەنت مامەڵەی پێوەکرا.

 

هەر دوو نرخی نەوتی برێنتی دەریای باکوور و نرخی نەوتی سووکی تەکساسی ئەمریکا لە هەفتەی رابردوودا بە رێژەی 1.8% دابەزینیان بەخۆوە بینی.

 

دنیس کیسلەر، جێگری سەرۆکی کۆمپانیای (بی ئۆ کەی فاینەنشیاڵ)، کە نووسینگەی لە ئۆکلاهۆمایە، لەو بارەیەوە رایگەیاند، "سەرەڕای ئەوەی بەهۆی بڕیارەکەی ئۆپێک پڵەسەوە چاوەڕوان دەکرێت نەوتێکی کەمتر لە بازاڕدا بخرێتەڕوو، بەڵام نیگەرانی لە کەمیی خواست لەلایەن چینەوە نرخی نەوتی دابەزاندووە."

 

ئەو شرۆڤەکارە دەڵێت، هێشتا وەرزی پشوو لە ئەمریکا دەستی پێنەکردووە، کە ببێتە هۆکار بۆ بەرزبوونەوەی خواست بۆ بەکارهێنانی نەوتی خاو.

 

چین هەفتەی رابردوو رایگەیاند، ئەم ساڵ چاوەڕوان دەکات بە رێژەی 5% ئابوورییەکەی گەشە بکات، بەڵام زۆربەی شرۆڤەکاران پێیانوایە ئەو وڵاتە ناتوانێت ئەو ئامانجەی بپێکێت.

 

خاوبوونەوەی ئابووریی چین دەبێتە هۆکار بۆ کەمبوونەوەی خواستی ئەو وڵاتە بۆ بەکارهێنانی نەوتی خاو.