رووداو دیجیتاڵ
هونەرمەندی گەنجی رۆژهەڵاتی کوردستان، رامان کوردی، گۆرانییەک بە ناوی (جامی بادە) تۆمار دەکات کە هۆنراوەی مامۆستا هێمنە و لە ماڵەکەی ئەویشدا لە مهاباد، کلیپی بۆ دەکات.
هۆنراوەی گۆرانییەکە لە شیعری (موو ناپسێنم)ی مامۆستا هێمن موکریانی وەرگرتووە. ئەمڕۆ پێنجشەممە، رامان کورد لە مهابادەوە قسەی بۆ تۆڕمی میدیایی رووداو کرد و گوتی: " کلیپەکە لە ماڵی مامۆستا هێمن لە کۆڵانی پردی یەرغووی مهاباد تۆمارکراوە."
رامان پێشتر چەندین گۆرانیی گوتووە، بەڵام ئەمە یەکەم ڤیدیۆ کلیپییەتی و خۆشی ئاوازی بۆ گۆرانییەکە داناوە و دەیەوێ لە رێگەی رووداوەوە بڵاوی بکاتەوە.
رامان دەڵێ: "لە کلیپەکەدا چەندین بەرهەم و میراتی ناوازە دەردەکەون، وەکو کەرەستە و پێداویستی و جلی مامۆستا هێمن موکریانی، مامۆستا هەژار موکریانی، هونەرمەند محەممەدی ماملێ، نووسەران محەممەدی قازی و ئەحمەدی قازی."
رامان کوردی لەبارەی گۆرانییەکەیەوە زیاتر دەڵێ: "ئەمە رێز لێنانە لە خزمەتەکانی مامۆستا هێمن، خزمەتێکی چکۆلەی خۆم بۆ ئەو مامۆستا گەورەیە و زیندوو راگرتنی کولتوور، ئەدەب و هۆنراوەی کوردی و هەروەها نزیک بوونەوە لەو مامۆستا گەورانە و بەرهەمەکانیان."
جامی بادە، هۆنراوەی مامۆستا هێمنە و ئاوازی رامان کوردییە، مەنسور حوسێنی رێکخەری کارەکەیە و محەممەد قەدیم پوور، میکس و مایسترینگی بۆ کردووە، لە ستۆدیۆ هارمۆنی لە مهاباد تۆمارکراوە و رامان و سامان عەلیزادە بە ئامێرەکانی باغڵەمە و کەواڵ و دوودووک بەشدارییان لە میوزیکەکەیدا کردووە.
رامان کوردی، ساڵی 1992 لە شاری مهابادی رۆژهەڵاتی کوردستان لەدایکبووە و تاوەکو ئێستا چەندین گۆرانی تۆمارکراوی هەیە کە بەشێکیان گۆرانییە فۆلکلۆرییەکانی هونەرمەندان (حەسەن زیرەک، ماملێ و تاهیر تۆفیق) بوون و زیندووی کردوونەتەوە.