کۆچبەرانی کورد لە بەرلین لەبارەی گەشەسەندنی راستڕۆکان لە ئەڵمانیا نیگەرانن

رووداو دیجیتاڵ

دوای سەرکەوتنی چەپەکان لە هەڵبژاردنی هەرێمی بەرلین، زیادبوونی ئاڵنگارییە سیاسییەکان و سەرکەوتنی راستئاژۆکان لە دوو ویلایەتی دیکە، هاووڵاتییان و کۆچبەرانی کورد لە بەرلینی پایتەخت رای جیاوازیان لەسەر داهاتووی سیاسیی وڵاتەکە و کێشە خزمەتگوزارییەکان هەیە؛ لە سەرووی هەموویانەوە بەرزبوونەوەی کرێی خانوو و بەهێزبوونی راستڕۆکان.

کۆچبەرانی کورد لە بەرلین سەرنج دەخەنە سەر کێشەکانیان و داهاتووی ژیانیان لە ئەڵمانیا. خەسرۆ بۆزان، هاونیشتمانییەکی نیشتەجێی بەرلینە، ئاماژە بە بەرزبوونەوەی تێچووی ژیان دەکات و دەڵێ، "پێش 5 ساڵ 70 یۆرۆم بۆ خەرجیی گاز و کارەبا دەدا، بەڵام ئێستا زۆر گرانتر بووە."

لە لایەکی دیکەوە، پرسی کەمبوونی خانوو و بەرزبوونەوەی کرێی نیشتەجێبوون بووەتە یەکێک لە نیگەرانییە سەرەکییەکانی دانیشتووانی بەرلین. دکتۆر شوکری گویلەر هاونیشتمانییەکی دیکەیە و رایدەگەیێنێت، "گرنگترین شت ئەوەیە کار زۆرتر بێت لە بەرلین و خانوو زۆرتر بێت. ساڵانە 35 هەزار کەسی نوێ دێنە بەرلین، بۆیە خانوو پێویستە."

بەشێک لە گەنجان و هاونیشتمانییان پێیانوایە، پارتی چەپ دەتوانێت دۆخەکە بۆ بەرژەوەندیی خەڵک بگۆڕێت و سنوورێک بۆ بڕیارەکانی کۆمپانیا گەورەکانی خانوبەرە دابنێت. کچە گەنجێک لە بەرلین گوتی، "دەیانەوێت کرێی خانوو کەم بکرێتەوە و هەموو شتێک ئەوەندە بەرز نەبێتەوە، هەروەها کۆمپانیا گەورەکان نەتوانن هەموو شوقەکان بکڕنەوە و بە پارەیەکی زۆر بەرز بیفرۆشنەوە."

بەشێکی دیکە لە هاونیشتمانییان ترسی خۆیان لە گەشەسەندنی باڵی راستڕۆی تووندڕۆ دەربڕی و پێیانوابوو سەرهەڵدانیان مەترسی لەسەر پێکەوەژیان و پاشەڕۆژی کۆچبەران دروست دەکات.

ئاری سابیر هاونیشتمانییەکی دیکەی شاری بەرلینە و بە دیاسپۆرای راگەیاند، "مانەوەی چەپەکان لە بەرلین، مانەوەی بەرلینە. لەبەر ئەوەی 70%ی دانیشتووانی بەرلین پەنابەرن. ئێستا ترسی راستڕۆکان زۆر گەورەتر بووە؛ ئامادە نیم لە وڵاتێکدا بژیم منداڵەکەم ياخود خۆم ببینە هاووڵاتیی پلە 2. هەر کاتێک بەرلین بکەوێتە دەست راستڕۆکان، بەرلین وەک خۆی نامێنێت."

جگە لە پرسی نیشتەجێبوون و رەوشی سیاسی، داواکارییەکانی دیکەی کوردانی بەرلین خۆیان لە چاککردنی ژێرخانی شارەکە، ئاسانکاریکردن لە راهێنانی پیشەیی و رەخساندنی دەرفەتی کاری زیاتردا دەبیننەوە.