ڤیانا رەشیدی سەرکەوتنێکی گەورە لە خوێندنی ئەڵمانی تۆمار دەکات

رووداو دیجیتاڵ

لە شاری فۆهنشراوسی ئەڵمانیا، چیرۆکی سەرکەوتنی کچێکی کوردی خەڵکی رۆژهەڵاتی کوردستان بە ناوی ڤیانا رەشیدی بووەتە جێی سەرنجی دیاسپۆرای کوردستانی. 

ڤیانا، کە نزیکەی 3 ساڵە لەگەڵ خێزانەکەی لە پیرانشارەوە رووی لە ئەڵمانیا کردووە، توانیویەتی لە ماوەیەکی کەمدا نموونەیەکی درەوشاوە لە کۆشش و سەرکەوتن پێشکێش بکات و سەرنجی ناوەندە فێرکاری و کوردییەکان بۆ لای خۆی رابکێشێ.

خاڵی وەرچەرخان لە ژیانی ڤیانادا ئەوە بوو کە تەنیا لە 6 مانگدا توانی زمانی ئەڵمانی و سیستمی خوێندنی ئەو وڵاتە فێربێت و وەک قوتابییەکی ئەڵمانی لە تاقیکردنەوەکاندا بەشداری بکات. ئەو هاونیشتمانییە لە 3 ساڵی رابردوودا لە خوێندن، هەرساڵ پلەی یەکەمی لە قوتابخانەکەی بەدەستهێناوە و لە کۆتاییدا بڕوانامەی (Mittlerer Schulabschluss)ـی بە نمرەی زۆر بەرزی 1.2 بەدەستهێنا.

جگە لە سەرکەوتنی لە قوتابخانە، ئەو کچە دەستی هاوکاریی بۆ پەناخوازانیش درێژ کردووە و لە وەرگێڕان بۆ پەنابەران لەگەڵ پزیشک، نەخۆشخانە و دامەزراوە حکومییەکاندا هاوکاریان دەکات. 

لەبەرامبەر ئەم سەرکەوتنە و خزمەتکردن بە کۆمەڵگە، لە دوو بۆنەی جیاوازدا لە (Stadthalle Vohenstrauß) و ناوەندی کوردی لە شاری نۆرنبرێگ، رێز لە ڤیانا رەشیدی گیرا و چەندین خەڵات و دیاریی پێشکێش کران.