رووداو دیجیتاڵ
ئەمڕۆ یەکشەممە نرخی دۆلار بەراورد بە تمەن 1,900 تمەن یان بە رێژەی 0.71% دابەزی و یەک دۆلار بە 264,300 تمەن مامەڵەی پێوەکرا.
مەودای گۆڕانکاریی نرخی دۆلار لە 24 کاژێری رابردوودا لە نێوان 264,000 بۆ 266,200 تمەندا بووە. بەهای دۆلار بەراورد بە هەفتەی رابردوو 0.53% دابەزیوە، بەڵام لە ماوەی شەش مانگی رابردوودا بە کۆی گشتی بە رێژەی 70.08% بەرزبوونەوەی تۆمارکردووە.
نرخی دۆلار بەرامبەر بە تمەن رۆژی شەممە، 3000 تمەن دابەزی و دۆلار لە دەوروبەری 262 هەزار تمەن داخرا. پسپۆڕانی ئابووری پێیان وایە، ئەمڕۆ بازاڕ زیاتر بەرەو هەڵبەز و دابەزێکی سنووردار هەنگاو دەنێت. ئەو پسپۆڕانە ئاماژە بەوە دەکەن ئەگەر هیچ هەواڵێکی سیاسیی یەکلاکەرەوە بڵاونەبێتەوە و خستنەڕووی دراو لە بازاڕدا بەردەوام بێت، دەکرێت نرخی دۆلار ئەمرۆ بە درێژایی رۆژ لە نێوان 260 بۆ 266 هەزار تمەندا بێت.
شارەزایانی ئابووری کە بۆ ماڵپەری (تەجارەت نیوز)ـی ئێرانی قسەیان کردووە، دەڵێن، "مەودای 260 هەزار تمەن دەبێتە یەکەمین ئاستی گرنگ بۆ هەڵسەنگاندنی هێزی خواست لە بازاڕدا. پاراستنی ئەم ئاستەش دەتوانێت رێگری لە دابەزینی زیاتری نرخەکان بکات، بەڵام ئەگەر گوشاری فرۆشتن لە بازاڕدا زیاتر بێت، پاشەکشەی نرخ بەرەو مەودای 258 بۆ 259 هەزار تمەن دوور لە چاوەڕوانییەکان نییە".
لە بەرامبەردا، بڵاوبوونەوەی هەواڵی نوێ سەبارەت بە پەرەسەندنی گرژییە سەربازییەکان یاخود زیادبوونی نیگەرانییەکان لەبارەی رێڕەوی دانوستاندنەکان، دەتوانێت خواستی خۆپارێزی بەهێزتر بکات. لەم دۆخەدا، رەنگە دۆلار جارێکی دیکە لە سنووری 265 هەزار تمەن نزیک ببێتەوە و لە ئەگەری زیاتربوونی خواستیشدا، ئاستەکانی 266 بۆ 267 هەزار تمەن، دەبنە ئەو ئاستانەی کە بازاڕ چاوی لێیە کە بەدەستی بهێنێتەوە.
