بانکی ناوەندیی عێراق دەنگۆی وردبینی لە هەژماری بانکیی سیاسییەکان رەتدەکاتەوە

رووداو دیجیتاڵ

بانکی ناوەندیی عێراق بڵاوبوونەوەی لیستێکی تایبەت بۆ پشکنین و وردبینیکردن لە هەژماری بانکیی چەند کەسایەتییەکی سیاسی رەتدەکاتەوە و رایدەگەیێنێت، رێکارەکانیان بە تەواوی پیشەیین و دوورن لە هەر مەرامێکی سیاسی.

ئەمڕۆ پێنجشەممە 29ی تشرینی یەکەمی 2026، بانکی ناوەندیی عێراق رایگەیاند، "ئەو هەواڵانەی لە هەندێک ماڵپەڕ و تۆڕە کۆمەڵایەتییەکان سەبارەت بە داواکاریی بانک بۆ وردبینیکردن لە هەژماری بانکیی چەند کەسایەتییەکی سیاسیی دیاریکراو بڵاوکراونەتەوە، دوورن لە راستییەوە و بنەمایان نییە."

لە راگەیێندراوەکەدا هاتووە، ئەم جۆرە دەنگۆیانە گوزارشت لە سرووشتی کارکردن و رێکارە دامەزراوەییەکانی بانکی ناوەندی ناکەن. داواش لە میدیاکان و هاووڵاتییان دەکات، زانیارییەکان تەنیا لە سەرچاوە فەرمییەکانەوە وەربگرن و نەکەونە داوی هەواڵی ناڕاستەوە.

بانکی ناوەندیی عێراق جەختیشی کردەوە، رێکارە چاودێری و وردبینییەکانی بانک بۆ سەر کەرتی دارایی، بەشێکن لە ئەرکە یاسایی و ئاساییەکانی خۆی، کە بەپێی ستانداردە بانکییە کارپێکراوەکان بەڕێوەدەچن و "هیچ رەهەند یان پاڵنەرێکی سیاسییان لەپشت نییە."