رووداو – تەندروستی
بەگوێرەی توێژینەوەیەکی نوێ، تێکەڵکردنی دەرمانەکانی (تاگریسۆ و ئۆرفاس) ماوەی مانەوەی تووشبووانی شێرپەنجەی سییەکان زیاد دەکات بەبێ بەرەوپێشچوونی نەخۆشییەکە.
کۆمپانیای ئەسترازێنکا سەرکەوتنی تاقیکردنەوەیەکی کلینیکیی نوێی راگەیاند، تێکەڵکردنی دوو دەرمانی دژەشێرپەنجە توانایەکی بێوێنەی لە باشترکردنی دۆخی تەندروستیی نەخۆشان و درێژکردنەوەی ژیانیان بێ پەرەسەندنی خانە شێرپەنجەییەکان خستووەتەڕوو.
لە تاقیکردنەوەکەدا هەردوو دەرمانی تاگریسۆ (Tagrisso) و ئۆرفاس (Orpathys) تێکەڵ کران بۆ ئەوەی وەکو چارەسەرییەکی کاریگەری شێرپەنجەی سییەکان بە نەخۆش بدرێت، د. یی-لۆنگ وو، پسپۆڕی شێرپەنجەی سینگ و سییەکان رایگەیاند، تاقیکردنەوەیان لەسەر ژمارەیەک نەخۆشان کردووە کە پێشتر هیچ چارەسەرێکیان وەرنەگرتبوو؛ دەرکەوت، ئەو نەخۆشانەی تێکەڵەی دەرمانەکەیان وەرگرتووە توانیویانە کاتێکی زۆرتر بێ پەرەسەندنی خانە شێرپەنجەییەکان بژین بەراورد بەو کەسانەی تەنیا یەک دەرمانیان پێدراوە.
رێکخراوی تەندروستیی جیهانی (WHO) دەڵێت، شێرپەنجەی سییەکان وەک یەکێک لە هۆکارە سەرەکییەکانی مردن بەهۆی شێرپەنجە لە جیهاندا دەناسێنێت و جەخت لەوە دەکاتەوە، زۆرینەی حاڵەتەکان بەهۆی جگەرەکێشانەوە روودەدەن. باشترین و کاریگەرترین هەنگاو بۆ خۆپارێزی هەمیشە وازهێنانی یەکجاریی جگەرەیە لەگەڵ ئەوەشدا، دەستنیشانکردنی زووی نەخۆشییەکە و بەکارهێنانی چارەسەرە پێشکەوتووەکان بە راوێژی پزیشکی پسپۆڕ، رۆڵێکی یەکلاکەرەوە لە بەرزکردنەوەی رێژەی رزگاربوونی نەخۆشاندا دەبینێت.
