رووداو - تەندروستی
توێژینەوەیەک لە زانکۆی تێکساس لە ئەمریکا، دەریدەخات نیشانە سەرەتاییەکانی نەخۆشییەکانی دڵ، گورچیلە و زیندەچالاکی لە منداڵانی تەمەن 8 ساڵیدا دەکرێت دەربکەوێت و بە هەندێک لە دەرمانەکانی دابەزاندنی کێش چارەسەر بکرێن.
د. راڤی شا، پسپۆڕی دڵ و سەرپەرشتیاری توێژینەوەکە دەڵێت ''زۆرێک لەو شێوازە پڕۆتینیانەی کە ئێمە دۆزیوماننەتەوە، دەکرێت بگۆڕدرێن، ئەمەش ئەوە دەگەیێنێت کە گەورەترین دەرفەت بۆ رێگریکردن لە نەخۆشییەکانی دڵ، دەیان ساڵ پێش دەرکەوتنی لە یەکەم نیشانەکان دەستپێدەکات''.
توێژەران بە بەکارهێنانی تەکنیکە شیکارییە پێشکەوتووەکان، نیشانەیەکی پڕۆتینییان لە خوێنی منداڵان و نەوجەواناندا دیاریکردووە کە هاوشێوەی ئەو نیشانە بایۆلۆژییانەیە کە پەیوەستن بە نەخۆشییە نەگۆڕەکانی دڵ و خوێنبەرەکان لە گەورەکاندا.
توێژینەوەکە 273 منداڵ و نەوجەوانی لەخۆگرتبوو. زیاتر لە سێیەکیان نەخۆشییەکانی دڵ، گورچیلە و زیندەچالاکیی جەستەییان هەبوو لەوانە قەڵەوی، بەرزەپەستانی خوێن، بەرگریی ئەنسۆلین (پێش شەکرە) و ئاستی چەوریی خوێن کە مەترسیی تووشبوون بە نەخۆشییەکانی دڵ زیاد دەکەن.
جێگەی سەرنجە، دەرکەوتووە کە ئاستی ئەم پڕۆتینانەی پەیوەستن بە نەخۆشییەوە لە گەورەکاندا، لە ئەنجامی وەرگرتنی چارەسەر بە سێماگلوتاید (semaglutide) دادەبەزێت، کە دەرمانێکی بەناوبانگی دابەزاندنی کێشە و بۆ چارەسەری شەکرەی جۆری 2 پەرەی پێدراوە.
