رووداو - تەندروستی
توێژینەوەیەکی نوێی بەریتانی لە زانکۆی مانچستەر، لەوە دەکۆڵێتەوە کە شیری دایک وەک ئامرازێک بۆ پشکنینی پێشوەختەی شێرپەنجەی مەمک بەکاربهێنرێت، بەتایبەتی لە خانمان لەکاتی دووگیانی و دوای منداڵبوون.
توێژینەوەکە بە ناوی "BRACELET-BM"ـە و تێیدا زانایان هەوڵدەدەن لەرێگەی شیری دایکەوە زووتر نیشانەکانی شێرپەنجەی مەمک دەستنیشان بکەن، بەراورد بە پشکنینەکانی ئێستای خوێن و وێنەگرتنی پزیشکی.
شێرپەنجەی مەمکی پەیوەست بە دووگیانی، زۆرجار لە قۆناخە پێشکەوتووەکاندا دەستنیشان دەکرێت، ئەمەش دەرفەتی چارەسەر و رزگاربوون کەم دەکاتەوە.
دکتۆر نیکی فلاوم، لە زانکۆی مانچستەر کە سەرپەرشتیی توێژینەوەکە دەکات، دەڵێت، "پێویستییەکی بەپەلە هەیە بۆ دۆزینەوەی رێگەی باشتر بۆ پشکنینی شێرپەنجەی مەمک لە خانمان لەکاتی دووگیانی و دوای منداڵبووندا".
دکتۆر نیکی فلاوم دەڵێت، "پێمانوایە شیری مەمک رەنگە دەروازەییەکی ناوازە بێت بۆ زانینی ئەوەی لەنێو تەندروستی مەمکدا چی روودەدات، چونکە زانیاریمان لەبارەی گۆڕانکارییە جیناتییەکانی ناو شیری مەمکەوە کەمە".

.jpeg&w=3840&q=75)

