زانکۆی هاوکلاند لە نەرویج: کەم خەوی، بەرگریی جەستە لاوازدەکات

توێژینەوەکە لە ناوەندی نەرویجی بۆ نەخۆشییەكانی خەو کراوە و دەرکەوتووە، ئەو پەرستارانەی لە شەودا كاردەكەن و بەشێوەیەكی گشتی كەمتر لە پێویست دەخەون، زیاتر رووبەڕووی نەخۆشی دەبنەوە.

بەگوێرەی توێژینەوەکە کە لەسەر 1335 پەرستار ئەنجامدراوە، ئەو پەرستارانەی رۆژانە نزیكەی دوو کاژێر كەمتر لە پێویست دەخەون، دوو هێندە زیاتر تووشی پەتا دەبن بەراورد بەو پەرستارانەی خەوێكی تەواویان هەیە.

سیری ڤاگە، توێژەر لە نەخۆشخانەی زانکۆی هاوکلاند لە نەرویج، و سەرپەرشتیاری توێژینەوەكە، رایگەیاند "توێژینەوەکە ئەوەی دەرخستووە كە كاری شەوانە و كەمی خەو كاریگەری لەسەر سیستمی بەرگریی جەستە دروست دەكات و مەترسیی تووشبوون بە هەوکردنی سییەکان 288٪ زیاد دەكات".

سەرپەرشتیاری توێژینەوەكە، پێشنیازدەکات گرنگی بە رێکخستنی کاتەکانی خەو بدرێت، تەندروستیی کارمەندان و چاودێرانی تەندروستی لەبەرچاو بگیرێت.