رووداو دیجیتاڵ
هاوپەیمانیی چوارچێوەی هاوئاهەنگی شیعەکان تاوتوێی رەشنووسی بڕیارێک دەکات لەبارەی سنووردارکردنی چەک بەدەستی دەوڵەت و کۆنترۆڵکردنی چەکی گرووپە چەکدارەکان.
دووشەممە، یەکی حوزەیرانی 2026، عەقیل ردێنی، گوتەبێژی هاوپەیمانیی نەسر بە تۆڕی میدیایی رووداوی گوت: "رەشنووسی ئەو بڕیارە لە کۆبوونەوەی ئەمڕۆ یان سبەی هاوپەیمانیی چوارچێوەی هاوئاهەنگی تاوتوێ دەکرێت و تایبەتە بە چوارچێوەی یاسایی سنووردارکردنی چەک بەدەستی دەوڵەت و تاوەکو ئێستا دوو گرووپ ئامادە نەبوون بە جێبەجێکردنى ئەو پلانە"
عەلی فالح زەیدى، سەرۆکوەزیرانی ئێستای عێراق لە گفتوگۆی ناڕاستەوخۆدایە لەگەڵ گرووپە چەکدارەکانی دەرەوەی دەستەی حەشدی شەعبی بۆ ئەوەی بیانکاتە بەشێک لەو دەستەیە و کۆنترۆڵکردنی چەکیان.
عەقیل ردێنی رایگەیاند، بیرۆکەی ئەو بڕیارە دەگەڕێتەوە بۆ سەردەمی دەسەڵاتی محەممەد شیاع سوودانی، سەرۆکوەزیرانی پێشوو، بەڵام جارێکی دیکە زیندوو و نوێ کراوەتەوە، بەتایبەت کە رەوتی نیشتمانیی شیعە بڕیاری دا، گرووپی چەکداریی سەرایا سەلام بەتەواوی لە رەوتەکە داببڕێت و بیخاتە ژێر رکێفی دەوڵەتەوە.
27ی ئایار موقتەدا سەدر، سەرۆکی رەوتی نیشتمانیی شیعە، گرووپی چەکداریی سەرایا سەلامی لە رەوتەکەی دابڕی، بۆ ئەوەی بە تەواوی ببنە بەشێک لە دەوڵەت و داوای لە پێکهاتەکانی دیکەی حەشدی شەعبییش کرد، خۆیان لە بڕیاری حیزبی و تایفی بپچڕێنن.
گوتەبێژی هاوپەیمانیی نەسر رایگەیاند، لەدوای ئەوەی چوارچێوەی هاوئاهەنگی رەشنووسی ئەو بڕیارە پەسند دەکات، دەنێردرێت بۆ ئەنجوومەنی وەزیران بۆ پەسندکردنی و ئەگەر پێویست بکات دەنێردرێت بۆ پەرلەمان.