رووداو دیجیتاڵ
لیژنەی نەوت و گازی پەرلەمانی عێراق بە جیا میوانداریی بەرپرسانی کۆمپانیای سۆمۆ و وەزارەتی نەوت دەکات، لەگەڵیاندا گفتوگۆ لەبارەی هەناردەی نەوت و پشکی بەنزینی هەرێمی کوردستان دەکات.
پێنجشەممە 13ی ئابی 2026، سیپان شێروانی، ئەندامی لیژنەی نەوت و گازی پەرلەمانی عێراق بە تۆڕی میدیایی رووداوی راگەیاند: "ئەمڕۆ میوانداریی بەرپرسانی کۆمپانیای بەبازاڕکردنی نەوتی عێراق (سۆمۆ) دەکەین لەبارەی بڕ و شێواز و رێگەی هەناردەی نەوت".
هەناردەی نەوتی عێراق بۆ کەمتر لە نیوەی ئاستی پێش جەنگ دابەزیوە، کە زۆربەی لە رێگەی بۆریی هەرێمی کوردستانەوە بۆ بەندەری جەیهانی تورکیا هەناردە دەکرێت.
سیپان شێروانی رایگەیاند، کۆبوونەوەیەکی دیکەی لیژنەیان بە میوانداریی نوێنەرانی وەزارەتی نەوت دەبێت لەبارەی بەنزینی هەرێمی کوردستان و پرسیارکردن لێیان لەبارەی ئەوەی ئایا دەتوانن ئەو بەنزینە دابین بکەن.
بڕیارە ئەمڕۆ فەرهاد ئەترۆشی، جێگری دووەمی سەرۆکی پەرلەمانی عێراق نووسراوێک بە واژۆی 169 ئەندام ئاراستە عەلى فالح زەیدى، سەرۆکوەزیران بکات، بۆ ئەوەی پشکی هەرێمی کوردستان لە نەوت بۆ بەکارهێنانی ناوخۆیی لە 50 هەزار بەرمیلەوە بۆ 140 هەزار بەرمیل زیاد بکەن.
