رووداو دیجیتاڵ
سەرۆکوەزیرانی عێراق لەگەڵ باڵیۆزی بەریتانیا لە بەغدا کۆبووەوە. لە کۆبوونەوەکەدا باڵیۆزی بەریتانیا پشتیوانیی وڵاتەکەی بۆ هەوڵەکانی حکومەتی عێراق لە دۆسیەکانی رووبەڕووبوونەوەی گەندەڵی، چاکسازیی دارایی و پاوانکردنی چەک لە دەستی دەوڵەتدا دەربڕیوە.
بەگوێرەی راگەیێندراوی نووسینگەی راگەیاندنی سەرۆکوەزیرانی عێراق، رۆژی پێنجشەممە، 13ی ئابی 2026، عەلی زەیدی، سەرۆکوەزیرانی عێراق پێشوازی لە عیرفان سدیق، باڵیۆزی بەریتانیا لە عێراق کردووە. لە دیداری نێوانیاندا پەرەپێدانی پەیوەندییە دووقۆڵییەکان و بەهێزکردنی هاوبەشیی نێوان هەردوو وڵات لە بوارە جیاوازەکاندا تاوتوێ کراوە.
لە بەشێکی دیکەی کۆبوونەوەکە تاوتوێی دوایین پێشهاتەکانی ناوچەکە کراوە. لە راگەیێندراوەکەدا هاتووە، "هەردوولا جەختیان لەسەر پێویستیی یەکخستنی هەوڵە هەرێمی و نێودەوڵەتییەکان کردووەتەوە بۆ هێورکردنەوەی گرژییەکان." سەرۆکوەزیرانی عێراق و باڵیۆزی بەریتانیا هاوڕابوون لەسەر ئەوەی کە "دیالۆگ و پەیوەندی" تەنیا رێگەن بۆ کۆتاییهێنان بە قەیرانەکان و چەسپاندنی ئاسایش و سەقامگیری لە ناوچەکەدا.
نووسینگەی سەرۆکوەزیرانی عێراق رایگەیاندووە، باڵیۆزی بەریتانیا لە دیدارەکەدا ستایشی هەوڵەکانی حکومەتی عێراقی کردووە بۆ سەقامگیرکردنی وڵات و، جەختی لە پشتیوانیی بەردەوامی لەندەن کردووەتەوە "بۆ چوار هەنگاوی ستراتیژیی کابینەکەی زەیدی، کە بریتین لە، رووبەڕووبوونەوەی گەندەڵی، هەنگاوەکانی چاکسازیی دارایی، سەروەریی یاسا و کۆکردنەوەی چەک لە دەستی دەوڵەتدا."
عیرفان سدیق ئاماژەی بەوەش کردووە، وڵاتەکەی ئامادەیە بۆ بەردەوامبوون لە هاوکاری و هاوئاهەنگی لەگەڵ عێراق لە هەموو ئەو بوارانەی کە جێگەی بایەخی هەردوولان، بە ئامانجی بەهێزکردنی دامەزراوەکانی دەوڵەت و پاراستنی سەقامگیریی عێراق.
