رووداو دیجیتاڵ
کارگەی "وەلەدی" بۆ رستن و چنین لە بەری رۆژئاوای شاری مووسڵ نۆژەنکرایەوە؛ پرۆژەکە لە رێگەیەوە هەلی کار بۆ زیاتر لە 650 کەس دابین دەکات و جلی فەرمی بۆ دامەزراوەکانی حکومەت بەرهەم دەهێنێت.
غەزوان داودی، جێگری پارێزگاری نەینەوا، رۆژی هەینی، 14ـی ئابی 2026، بە رووداوی راگەیاند: "ئەم کارگەیە بە هاوبەشیی حکومەتی عێراق و حکومەتی ئەڵمانیا، لە رێگەی بانکی گەشەپێدانی ئەڵمانی (KfW) و بەرنامەی نەتەوە یەکگرتووەکان بۆ گەشەپێدان (UNDP) نۆژەنکراوەتەوە و خراوەتەوە گەڕ."
جێگری پارێزگاری نەینەوا ئاماژەی بەوە کرد، کارگەکە ئێستا بە تەواوی توانای خۆیەوە دەستی بە بەرهەمهێنان کردووە و جلی فەرمی و پێداویستییەکانی دیکەی قوماش بۆ دامەزراوە حکوومییەکان دابین دەکات.
بەگوتەی غەزوان داودی، لە کۆی ئەو 650 کەسەی لە کارگەکەدا کار دەکەن، نزیکەی 300ـیان ئافرەتن کە لە بەشەکانی بەرهەمهێنان، کۆنترۆڵکردنی جۆری و کارگێڕیدا سەرقاڵی کارن.
جێگری پارێزگاری نەینەوا دەڵێت، کردنەوەی ئەم کارگەیە لەدوای نۆژەنکردنەوەی، وێستگەیەکی گرنگە بۆ بووژانەوەی ئابووریی پارێزگای نەینەوا و رەخساندنی بژێویی بەردەوام بۆ دانیشتووانی مووسڵ، بەتایبەتی بۆ گەنجان و ژنان کە دەتوانن لە رێگەیەوە ببنە خاوەن هەلی کار.
.jpg&w=3840&q=75)