رووداو دیجیتاڵ
سەرۆکی دەستەی گومرگی عێراق پێشبینی دەکات لە مانگی تشرینی دووەم بەئەلیکترۆنیکردنی دەروازە سنوورییەکانی هەرێمی کوردستان دەستپێبکات و تاوەکو کۆتایی ساڵ تەواو بکرێت.
سامر قاسم داوود، سەرۆکی دەستەی گشتیی گومرگی عێراق بە تۆڕی میدیایی رووداوی راگەیاند: پێشبینی دەکەن لە مانگی تشرینی یەکەمی داهاتووەوە دەست بکرێت بە جێبەجێکردنی پڕۆژەی بەئەلیکترۆنیکردنی دەروازە سنوورییەکانی هەرێمی کوردستان و لە کۆتایی ساڵ ئەو سیستەمە لە هەموو دەروازە سنوورییەکان تەواو بکرێت.
ئەو رێکارە بەشێکە لە رێککەوتنی نێوان هەولێر و بەغدا لەبارەی یەکخستنی گومرگ و جێبەجێکردنی سیستەمی ئەسیکۆدا لە هەرێمی کوردستان.
سامر قاسم داوود رایگەیاند، جێبەجێکردنی ئەو سیستەمە لە دەروازە سنوورییەکانی هەرێمی کوردستان وادەکات 50% داهاتى گومرگ بگەڕێتەوە بۆ گەنجینەی دەوڵەت و ئەو داهاتە زیاد بکات.
لێکتێگەیشتنی نێوان هەولێر و بەغدا لەبارەی سیستەمی ئەسیکۆدا، رەزامەندیی ئەنجوومەنی وەزیرانی عێراقی ماوە، هەردوولا رێککەوتوون کە داهاتی گومرگ بە شێوەی نیو بە نیو وەربگرن.
ئەو رێککەوتنە وادەکات بازرگانیی هەرێمی کوردستان بە ئاسانتر دەستیان بگات بە دۆلاری بانکی ناوەندی بۆ هەناردەکردنی کاڵا، کە تاوەکو ئێستا بەهۆی ئەوەی هەرێمی کوردستان نەچووەتە ناو سیستەمی ئەسیکۆدا، لەو دۆلارە بێبەشن.
