.png&w=3840&q=75)
رووداو دیجیتاڵ
وەزیرانی دەرەوەی عێراق و سعودیە پەیوەندییەکی تەلەفۆنییان ئەنجامدا و تێیدا جەختیان لە گرنگیی هێورکردنەوەی دۆخی ناوچەکە و گەڕانەوە بۆ مێزی گفتوگۆ کردەوە.
ئەمڕۆ سێشەممە، فۆئاد حوسێن، وەزیری دەرەوەی عێراق لە پەیوەندییەکی تەلەفۆنیدا لەگەڵ فەیسەڵ بن فەرحان، وەزیری دەرەوەی سعودیە، پێشهاتەکانی ناوچەکەیان تاوتوێ کرد.
بەگوێرەی راگەیێندراوی وەزارەتی دەرەوەی عێراق، هەردوو وەزیر باسیان لە مەترسییەکانی تێکچوونی دۆخی ناوچەکە و رەنگدانەوەی لەسەر ئاسایش و سەقامگیریی وڵاتان کردووە.
لە راگەیێندراوەکەدا هاتووە، هەردوو لایەن جەختیان لە "گرنگیی کارکردن بۆ کۆنترۆڵکردنی ئاڵۆزییەکان و گەڕانەوە بۆ رێڕەوی دانوستاندن و گفتوگۆ" کردووەتەوە.
وەزیری دەرەوەی عێراق ئاماژەی بەوە کردووە، پێویستە هاوئاهەنگی و راوێژی بەردەوام لەنێوان بەغدا و ریاز هەبێت، هاوکات لەگەڵ وڵاتانی دیکەی پەیوەندیدار گفتوگۆکان بەردەوام بن سەبارەت بە پێشهاتە هەرێمییەکان بۆ پاراستنی سەقامگیریی ناوچەکە.
تەنگەی هورمز، کە گرنگترین رێڕەوی وزەی جیهانە، ئێستا جووڵە تێیدا سنووردارە، ئەوەش بەهۆی جەنگی ئەمریکا و ئێران.
محەممەدباقر قالیباف، سەرۆکی پەرلەمانی ئێران دەڵێ، تاوەکو گەمارۆی سەر بەندەرەکانی وڵاتەکەی هەڵنەگیرێ، پارە بلۆککراوەکان ئازاد نەکرێن، گەمارۆی نەوت کۆتایی نەیەت و هەڕەشەکان و ئۆپەراسیۆنی سەربازی لە هەموو بەرەکان رانەگیرێ، تەنگەی هورمز ناکرێتەوە.
